Qaraǵandy oblysynda joldarǵa blokbeketter qoıyldy
ASTANA. KAZINFORM — Kúndiz-túni kezekshilik atqarý úshin 150-den asa polıtsııa qyzmetkeri, 30 qyzmettik avtokólik jáne arnaıy tehnıka jumyldyryldy, dep habarlaıdy Polisia.kz.
1 maýsymynan bastap elimizde «Qarasora-2025» jedel-aldyn alý sharasy bastaldy. Naýqannyń basty maqsaty — Qazaqstan aýmaǵynda esirtki ósirý, óndirý jáne taratýdyń jolyn kesý.
— Atalǵan shara aıasynda Qaraǵandy oblysynda qaýipsizdikke baǵyttalǵan jedel is-sharalar qolǵa alyndy. Aımaqtyń basty avtojoldarynda mobıldi blokbeketter ornatylyp, jol qozǵalysyna qatań baqylaý engizildi. Kúndiz-túni kezekshilik atqarý úshin 150-den astam polıtsııa qyzmetkeri, 30 qyzmettik avtokólik jáne arnaıy tehnıka jumyldyryldy. Árbir kúdik týdyrǵan kólik pen baǵyt muqııat tekserilip jatyr, — dep túsindirdi vedomstvo.
Operatsııanyń alǵashqy kúniniń ózinde aıtarlyqtaı nátıje tirkeldi. Osakarov aýdanyna qarasty Batpaq aýylynda Qaraǵandy oblystyq prokýratýrasynyń qoldaýymen esirtki qylmysyna qarsy is-qımyl basqarmasy jasyryn esirtki zerthanasyn anyqtap, onyń jumysyn toqtatty. Shahtınsk qalasynyń 24 jáne 25 jastaǵy eki turǵyny ustaldy. Tergeý málimetterine sáıkes, olar shamamen 3 mıllıon teńgege jeke úı satyp alyp, ony sıntetıkalyq esirtki óndiretin zańsyz zerthanaǵa aınaldyrǵan.
— Tintý barysynda 121 kanıstr hımııalyq reagent, óndiristik jabdyqtar, respıratorlar, jeke qorǵanys quraldary, sondaı-aq esirtki jasaýǵa arnalǵan prester men reaktorlar tárkilendi. Jalpy salmaǵy shamamen 2 tonna bolatyn prekýrsorlar alyndy, — dedi Qaraǵandy oblystyq polıtsııa departamenti bastyǵynyń birinshi orynbasary Ábil Ábildın.
Bul — bıylǵy jyldyń basynan beri tirkelgen úshinshi iri oqıǵa. Ustalǵan azamattarǵa qatysty qylmystyq is qozǵaldy. Qazirgi ýaqytta olar ýaqytsha ustaý ızolıatoryna qamaldy.
Buǵan deıin Qaraǵandyda adamdardy qaıyr suraýǵa májbúrlegen qylmystyq top músheleri sottalǵanyn jazǵanbyz.