Qaraǵandy oblysynda jol apatynan bes adam mert boldy

ASTANA. KAZINFORM – Qaraǵandy oblysynda úsh kóliktiń soqtyǵysýy saldarynan bes adam jan tapsyrdy.

«Oqıǵa Qaraǵandy oblysyndaǵy Abaı qalasy men Dýbovka aýyly arasynda, "Qyzylorda – Pavlodar" tas jolynyń 931-shi shaqyrymynda 9 maýsym kúngi saǵat 22.23-te boldy. Audi, Chevrolet Cobalt, jáne Toyota Previa kólikteriniń soqtyǵysýy saldarynan 5 adam mert boldy. Atap aıtsaq, Chevrolet kóliginiń 22 jastaǵy júrgizýshisi men tórt jolaýshysy oqıǵa ornynda kóz jumdy», - delingen jergilikti polıtsııa departamenti taratqan habarlamada.

Al eki jolaýshy aýrýhanada jatyr.

«Eki adamnyń jaǵdaıy aýyr, olarǵa aýrýhanada tıisti kómek kórsetilýde», - dedi Qaraǵandy oblysynyń densaýlyq saqtaý basqarmasy basshylyǵy.

Aıta keteıik, kúni keshe "Almaty-Óskemen" tasjolynyń 55-shaqyrymynda taǵy bes adamnyń ómirin qıǵan kólik apaty boldy.