Qaraǵandy oblysynda jol apaty jıilep barady: bıyl 500 derek tirkeldi

QARAǴANDY. KAZINFORM - Qaraǵandy óńirindegi jol-kólik oqıǵalarynyń ósimi qoǵamda alańdaýshylyq týdyrýda. Bıyl oblysta 500-ge jýyq apat tirkelip, 101 adamnyń ómiri qıyldy. Túrli deńgeıde jaraqat alǵandardyń sany 600-den asty.

Sarapshylardyń aıtýynsha, eń qaterli aımaqtardyń biri – «Qaraǵandy – Balqash» avtojoly. Segiz aıdyń ishinde bul jerde 51 jol apaty oryn alǵan. Saldarynan 34 adam qaza tapsa, ondaǵan azamat aýyr jaraqat aldy.

Dárigerlerdiń sózinshe, apattardyń sıpaty da ózgergen.

– Sońǵy kezderi bir jol apatynda birden birneshe adam zardap shegetin jaǵdaı jıilep ketti. Ásirese mıkroavtobýstar qatysqan kezde birden 3–4 adam jaraqat alady. Soǵan baılanysty travmatologııa bólimine túsetin naýqastar kúrt kóbeıdi, – deıdi Balqash kópsalaly aýrýhanasynyń bas dárigeri Serikbol Túsipbekov.

Balqashta salynyp jatqan jańa aýrýhana korpýsy osy qajettilikten týyndap otyr. Onda zamanaýı operatsııalyq zal men qabyldaý bólimi bolady, sondaı-aq aımaqtyq travmatologııa ortalyǵy ashylady. Jospar boıynsha, naýqastarǵa tomografııa, ÝDZ jáne basqa da zertteýler jedel jasalyp, keshendi tekserýden birneshe mınýtta ótýge múmkindik beriledi.

Degenmen medıtsınanyń jańa múmkindikteri adam ómirin saqtap qala almaıdy. Polıtsııa málimetinshe, qaıǵyly jaǵdaılardyń negizgi sebepteri – jyldamdyqty shekten tys asyrý, jol erejesin elemeý jáne júrgizýshilerdiń rýlde qalǵyp ketýi.

Jol apatynyń aldyn alý úshin trassada birqatar sharalar atqarylýda: jol tórt jolaqqa keńeıtilip, bólý qorshaýlary men túngi ýaqytta baǵdar beretin jaryq shaǵylystyrǵysh elementter ornatyldy.

– Jaqyn arada jol boıyna LED-ekrandary bar 30 aqparattyq arka ornatamyz. Olar beınebaqylaý kameralarymen jabdyqtalady. Ekrandarda joldyń jaı-kúıi, aýa raıy men qozǵalysqa qatysty shekteýler týraly aqparat naqty ýaqyt rejıminde kórsetiledi. Bul kóptegen apattyń aldyn alýǵa sep bolady, – dedi «QazAvtoJol» AQ Qaraǵandy fılıaly dırektorynyń orynbasary Aıbek Amantaev.

Alaıda mamandar qansha saqtyq sharalary qabyldansa da, eń basty jaýapkershilik júrgizýshiniń ózine júkteletinin aıtady. Joldaǵy árbir apat – beıqamdyqtyń quny tym qymbat ekenin kórsetedi.

Osyǵan deıin Aqmola oblysyndaǵy «Astana-Petropavl» tas jolyndaǵy jol apatynan jasóspirim kóz jumǵany jaıly jazǵan bolatynbyz.