Qaraǵandy oblysynda jylqy aýrýyna qatysty zertteý júrgiziledi
ASTANA. KAZINFORM – Aýyl sharýashylyǵy mınıstrligi Qaraǵandy oblysynda jylqylardyń aýrýyna qatysty zertteý júrgizedi.
2023 jyldyń mamyrynan bastap Buqar jyraý aýdanynyń Úmitker aýylynda jylqylardyń epızootııalyq lımfongoıti boıynsha karantın engizilgen bolatyn. Osy ýaqyt ishinde respýblıkalyq bıýdjetten ótemaqy tóleı otyryp, atalǵan eldi-mekendegi 185 bas jylqy joıyldy. Karantındik is-sharalar jalǵasyn taýyp otyr.
«BAQ pen áleýmettik jelilerde 2024 jyldyń 15 qańtarynda E.Bekovtyń „Erjan“ ShQ-daǵy 2 bas jylqyda epızootııalyq lımfangıttiń klınıkalyq belgileri baıqalǵany týraly aqparat jarııalanǵandy. 16 qańtarda 2 bas jylqydan synama alynyp, QR AShM Veterınarııalyq baqylaý jáne qadaǵalaý komıtetine qarasty „Respýblıkalyq veterınarlyq zerthana“ ShJQ RMK Qaraǵandy oblystyq fılıalyna jetkizildi. Zerthananyń taldaý nátıjesi — teris», — delingen AShM baspasóz qyzmeti taratqan habarlamada.
Sonymen qatar, aǵymdaǵy jyldyń 4 qańtarynda mamandar Tórtkól aýylynyń turǵyny M.Jumadildiń jylqylarynan eki synama aldy. Buǵan deıin, 2023 jylǵy 9 qazanda osy kisige tıesili 5 bas jylqydan synama alynyp, «Respýblıkalyq veterınarlyq zerthana» ShJQ RMK Qaraǵandy oblystyq fılıalyna jiberilgen bolatyn. Ol kezde de taldaý nátıjesi «teris» dep kórsetilipti.
Úmitker aýyldyq okrýgindegi epızootııalyq jaǵdaıdy eskere otyryp, Veterınarııalyq baqylaý jáne qadaǵalaý komıteti arnaıy komıssııa qurdy, onyń quramyna kelisim boıynsha «Veterınarııa jónindegi ulttyq referenttik ortalyq» ShJQ RMK, QR AShM mamandary jáne QR Densaýlyq saqtaý mınıstrliginiń «Ǵylymı bıologııalyq qaýipsizdik problemalarynyń zertteý ınstıtýty» qyzmetkerleri engizildi.
«Arnaıy komıssııa 2024 jyldyń 2-3 aqpanynda monıtorıng júrgizý úshin Úmitker aýyldyq okrýgine bardy. Olar Úmitker, Tórtkól, Úlgi aýyldaryndaǵy saý, jaıylymda júrgen jáne aýrý jylqylardan bıologııalyq jáne patologııalyq materıaldar synamalaryn aldy. Sondaı-aq, mamandar jergilikti turǵyndarmen kezdesti», - dep jazady atalmysh vedomostvonyń baspasóz qyzmeti.
Aıta keteıik, komıssııa sapary kezinde «Erjan» sharýa qojalyǵynyń ıesi synama alý úshin jylqylaryn bermegen edi. Sol sebepti, 6-7 aqpanda Úlgi aýylynda jylqylardan qosymsha 11 synama jáne Tórtkól aýylyndaǵy, atap aıtqanda, «Erjan» sharýa qojalyǵyndaǵy 2 jylqydan synama aldy.
Alynǵan synamalar Respýblıkalyq veterınarııalyq zerthananyń Qaraǵandy fılıalyna jetkizilip, Bıologııalyq qaýipsizdik problemalary ǵylymı-zertteý ınstıtýtyna jiberildi. Zertteý nátıjeleri týraly qosymsha habarlanady.
Budan bólek, ǵylymı ınstıtýtpen birlesip jylqylardy vaktsınatsııalaý jáne karantın jaǵdaıynda epızootııalyq lımfangıtke qarsy ımmýnıtettiń shıelenisýine monıtorıngtik zertteýler júrgiziletin bolady.
