Qaraǵandy oblysynda jylytý maýsymynyń bastalý kestesi belgili boldy
QARAǴANDY. KAZINFORM – Qaraǵandy oblysy 2025–2026 jylǵy jylytý maýsymyna tolyq daıyn. Áleýmettik nysandar men turǵyn úıler, sondaı-aq ınjenerlik jeliler túgel tekserilip, jylý berýge ázir. Bul týraly óńirlik bılik málimdedi.
Jylytý maýsymy kezeń-kezeńimen 25 qyrkúıekten bastalady. Alǵashqy bolyp jylý Qaraǵandy, Temirtaý jáne Shahtınsk turǵyndaryna beriledi. 1 qazannan bastap Balqash, Saran, Abaı, Buqar jyraý, Qarqaraly, Nura jáne Osakarov aýdandary jylytý júıesine qosylady. Shet aýdanynda jylý 10 qazanda, Prıozersk turǵyndaryna 12 qazanda beriledi.
Áleýmettik nysandardyń birqatary jylýǵa erterek qosyldy. Máselen, Saran qalasyndaǵy mekemeler 15 qyrkúıekten bastap jylýmen qamtyldy, Nura aýdanynda – 18 qyrkúıekten.
Aldaǵy qysqy maýsymǵa daıyndalǵan ınfraqurylym:
- 603 jergilikti jylý kózi (61 qazandyq jáne 542 avtomattandyrylǵan júıe),
- shamamen 1,5 myń shaqyrym ınjenerlik jeli (onyń ishinde 50,3 km jylý, 46,3 km sý qubyry, 11,8 km káriz jáne 1 388 km elektr jelileri),
- 493 qosalqy stantsııa,
- 1 107 áleýmettik nysan (589 bilim berý, 221 densaýlyq saqtaý, 297 mádenıet pen sport nysany),
- 5 964 kópqabatty turǵyn úı.
Jylytý maýsymyna daıyndyqqa bıyl 115 mlrd teńgeden astam qarajat bólindi. Onyń ishinde: 32,6 mlrd teńge – energııa kózderine, 1,3 mlrd – jergilikti jylý kózderine, 18,2 mlrd – jylý jelilerine, 25,9 mlrd – elektr jelileri men qosalqy stantsııalarǵa, 22,4 mlrd – sý jáne káriz júıelerine, 15,4 mlrd – gazdandyrý jobalaryna baǵyttaldy.
Óńirdegi 7 iri energııa kózinde josparly jóndeý jalǵasyp jatyr. Bıyl 47 qazandyq pen 29 týrbınany jańartý kózdelgen. Qazirgi ýaqytta 27 qazandyqtyń (57,4%) jáne 20 týrbınanyń (68,9%) jóndeýi aıaqtaldy, taǵy 11 qazandyq pen 4 týrbınada jumys júrip jatyr.
Temirtaý qalasyndaǵy «Qarmet» AQ JEO-2 stantsııasynda jańa jetinshi qazandyq iske qosyldy. Ol qosymsha 80 Gkal/saǵ jylý qýatyn berip, qalany senimdi jylýmen qamtýǵa múmkindik beredi. Sondaı-aq, Topar GRES-inde №3 týrbına paıdalanýǵa berilip, elektr qýaty 130 MVt-qa artty.
Barlyq stantsııa otyn jetkizý kelisimderin bekitken. Qazirgi tańda kómir men mazýt jetkizilip jatyr. Maýsymǵa qajettilik — 7,1 mln tonna kómir jáne 40,6 myń tonna mazýt. Búginde qoımalarda 1,468 mln tonna kómir men 11,3 myń tonna mazýt bar.
Halyq pen kommýnaldyq-turmystyq sektorǵa qajettilik 1,27 mln tonna kómirdi quraıdy. Onyń ishinde:
- kommýnaldyq-turmystyq sektorǵa – 371 myń tonna (100% qamtamasyz etilgen),
- halyqqa – 901,3 myń tonna (qamtamasyz etilgeni 703 myń tonna, ıaǵnı 77,9%).
Jalpy alǵanda, kómirmen qamtamasyz etý deńgeıi 84,4%.
Osylaısha, Qaraǵandy oblysy aldaǵy qysqa tolyq daıyndyqpen qadam basty. Jańartylǵan jabdyqtar men jylý kózderi turǵyndardy aldaǵy sýyqta senimdi túrde jylýmen jáne jaryqpen qamtýǵa múmkindik beredi.
Eske salsaq, osyǵan deıin Qaraǵandy 25-shi qyrkúıekten bastap jylytý júıesine qosylatyny jaıly habarlaǵan bolatynbyz.