Qaraǵandy oblysynda jyl sońyna deıin 500 myń sharshy metr turǵyn úı salynady

ASTANA. KAZINFORM – Jyl sońyna deıin óńirde 500 myń sharshy metr turǵyn úı salynady. Bul týraly Qaraǵandy oblysynyń ákimi Ermaǵanbet Bólekpaev málimdedi.

Oblys basshysynyń aıtýynsha, jalpy 9 aıda 380 myń sharshy metr turǵyn úı paıdalanýǵa berilgen.

«Jyl sońyna deıin 500 myń sharshy metr salynady. Memlekettik qoldaý sharalaryn paıdalana otyryp, aýyldarda qurylysty belsendi júrgizetin bıznestiń rólin erekshe atap ótkim keledi. 55 myń sharshy metr nemese 755 páter salyndy», - dedi ákim.

Budan basqa, TKSh salasynda 31 mlrd teńge somaǵa jylýmen jabdyqtaý boıynsha 14 joba iske asyrylýda, onyń ishinde, oblys ortalyǵynda, Balqashta, Temirtaýda, Shahtınskide 17 km magıstraldyq jylý jelisi salyndy.

«Qaraǵandyda jylý qýaty tapshylyǵy máselesin úshinshi jylý shyǵarǵyshyn salý arqyly sheshildi. Bul oblystaǵy sońǵy 30 jyldaǵy TKSh-daǵy eń iri joba. Aldaǵy jeti jylda úshinshi jylý shyǵarǵysh 1,2 mln sharshy metr turǵyn úıdi, ıaǵnı 20 myńnan astam jańa páterdi jylýmen qamtamasyz etedi», - dedi Ermaǵanbet Bólekpaev.

Bıyl 14 aýyldyń 1500 turǵyny sapaly aýyz sýmen qamtamasyz etiledi. 7 621 úıge gaz jelileri tartyldy, onyń 3 573-i gazǵa qosyldy.

Buǵan deıin oblys ákimi Saranda jańadan salynǵan jylý qazandyǵy nege tolyq jumys istemeı turǵanyn túsindirgen edi.