Qaraǵandy oblysynda jyl basynan beri 380 adam qyzylsha juqtyrǵan
QARAǴANDY. KAZINFORM — Jyl basynan beri óńirde qyzylsha ınfektsııasynyń taralýy turaqty saqtalyp otyr, bul rette aýyrǵandardyń basym bóligi balalarǵa tıesili. Dárigerler jaǵdaıdy ujymdyq ımmýnıtettiń tómendeýimen baılanystyryp, vaktsınatsııany keıinge qaldyrmaýǵa shaqyrady.
Qaraǵandy oblysynda qyzylsha derti boıynsha epıdemıologııalyq jaǵdaı kúrdeli kúıinde qalyp otyr. 2026 jyldyń 1 qańtarynan 23 sáýirine deıin óńirde zerthanalyq turǵyda rastalǵan 380 jaǵdaı tirkelgen. Aýyrǵandardyń basym bóligi — 14 jasqa deıingi balalar, olardyń úlesine barlyq jaǵdaılardyń 86%-y tıesili.
Mamandardyń aıtýynsha, ınfektsııanyń taralýyndaǵy negizgi faktor — vaktsınatsııa deńgeıiniń tómendigi. Aýyrǵandardyń 83,6%-y — ekpe almaǵan balalar (318 adam). Vaktsınadan bas tartý sebepteri ártúrli: ata-analardyń 44,3%-y ekpeden sanaly túrde bas tartady, 33,6% balalar jas ereksheligine baılanysty vaktsınatsııalaýǵa jatpaıdy, 10,6%-ynda medıtsınalyq qarsy kórsetilim bar, al 11,5% jaǵdaıda ekpe mártebesi belgisiz.
Eń kúrdeli jaǵdaı Qaraǵandy men Balqash qalalarynda, sondaı-aq Buqar jyraý jáne Qarqaraly aýdandarynda qalyptasqan. Munda syrqattanýshylyq kórsetkishteri oblystyq ortasha deńgeıden joǵary.
Aýrý jaǵdaılarynyń ósýine baılanysty óńirde ımmýndaý sharalary kúsheıtildi. Qosymsha jappaı vaktsınatsııa aıasynda 6-11 aı aralyǵyndaǵy 1615 balaǵa ekpe salyndy (qamtylýy — 37,7%), taǵy 2387 bala (60,6%) tolyqtyrýshy vaktsınatsııamen qamtyldy.
— Búginde biz vaktsınatsııa deńgeıi men qyzylsha dertiniń taralýy arasynda tikeleı baılanysty kórip otyrmyz. Aýyrǵandardyń basym bóligi — ekpe almaǵan balalar. Vaktsınatsııa — qorǵanýdyń eń tıimdi tásili, jáne bir jaıtty túsingen jón: ınfektsııanyń ózinen bolatyn asqyný qaýpi ekpeden keıingi yqtımal reaktsııalardan áldeqaıda joǵary, — dep atap ótti Qaraǵandy oblysynyń sanıtarııalyq-epıdemıologııalyq baqylaý departamenti basshysynyń orynbasary Gúljan Baıǵutanova.
Sanıtarııalyq qyzmetterdiń málimetinshe, Qazaqstanda vaktsınatsııa Ulttyq egý kúntizbesi aıasynda tegin júrgiziledi. Ol 21 juqpaly aýrýdy qamtıdy jáne Dúnıejúzilik densaýlyq saqtaý uıymynyń usynymdaryna sáıkes keledi. Júıeli ımmýndaý nátıjesinde elde birqatar qaýipti ınfektsııalar aıtarlyqtaı azaıǵan: mysaly, epıdemııalyq parotıt 100 eseden astam, A vırýstyq gepatıti de 100 esege, al V gepatıti 100 eseden astam tómendegen.
Qaraǵandy oblysynda kóp jyldar boıy dıfterııa men qyzamyq tirkelmegen, al sirespe jaǵdaılary birli-jarym ǵana. Dárigerler bul nátıjelerge dál vaktsınatsııanyń arqasynda qol jetkizilgenin atap ótedi.
Alaıda COVID-19 pandemııasy kezeńinde profılaktıkalyq egýmen qamtý deńgeıi tómendep, ujymdyq ımmýnıtet álsiredi. Sonyń saldarynan 2023 jyldan bastap óńirde qyzylsha órshýleri qaıta tirkele bastady, al 2024 jyldan beri kókjótel jaǵdaılary da baıqalýda.
Dárigerler áleýmettik jelilerde taralatyn jalǵan aqparattyń áserine de nazar aýdarady. Tipti qysqa ýaqytqa jalǵan málimetterge tap bolý ata-analardyń vaktsınatsııaǵa degen senimin álsiretip, epıdemıologııalyq jaǵdaıǵa keri yqpal etýi múmkin.
Mamandardyń aıtýynsha, qyzylshadan keıingi asqynýlar óte aýyr bolýy yqtımal — júıke júıesiniń zaqymdanýynan bastap ólim-jitimge deıin ákelýi múmkin. Al ekpeden keıingi reaktsııalar, ádette, qysqa merzimdi jáne jeńil túrde ótedi.
Qalyptasqan jaǵdaıdy eskere otyryp, sanıtarııalyq dárigerler ata-analardy balalardy ýaqytyly vaktsınatsııalaýǵa jáne jalǵan aqparattyń yqpalyna berilmeýge shaqyrady. Sebebi ınfektsııanyń taralýyn tejeýdiń negizgi quraly — vaktsınatsııa.
Buǵan deıin Qazaqstanda qyzylshaǵa shaldyǵý deńgeıiniń tómendegeni habarlanǵan bolatyn: sońǵy aptada dert juqtyrý jaǵdaılary shamamen úshten birge azaıǵan.
