Qaraǵandy oblysynda jeti adamnyń ómirin qıǵan jol apatyna kináli júrgizýshige sot úkimi shyqty
QARAǴANDY. KAZINFORM - Qaraǵandy oblysy sotynda «Almaty – Ekaterınbýrg» trassasynda bıyl jazda jeti adamnyń ómirin qıǵan jol apatyna qatysty is boıynsha úkim shyqty. Sot júrgizýshini jol júrý erejesin buzdy dep tanyp, ony bes jylǵa bas bostandyǵynan aıyrdy.
Qaraǵandy oblysynyń qylmystyq ister jónindegi mamandandyrylǵan aýdanaralyq sotynda jeti adamnyń ómirin qıǵan jol apatyna qatysty qylmystyq is qaraldy. Qaıǵyly oqıǵa 2025 jylǵy 5 shildede «Almaty – Ekaterınbýrg» avtojolynyń Balqash qalasyna jaqyn, 791-shaqyrymynda bolǵan.
Sot anyqtaǵandaı, Kia Sedona avtokóliginiń júrgizýshisi basqa mashınany basyp ozý kezinde jol belgilerine jáne joldyń jaǵdaıyna mán bermegen. Burylý kezinde ol kólik quraldarynyń salmaǵyn ólsheıtin jabdyq ornatý úshin qazylǵan shuńqyrǵa túsip ketken. Saldarynan mınıven temir qorshaýǵa soǵylyp, órtenip ketken. Kólikte otyrǵan jeti jolaýshy oqıǵa ornynda qaza tapqan. Al júrgizýshi men taǵy bir jolaýshy ártúrli jaraqattarmen Shet aýdanynyń aýrýhanasyna jetkizilgen.
Sot protsesi barysynda er adamnyń kinási tolyq dáleldendi. Buǵan aıyptalýshynyń óz moıyndaýy, kýágerlerdiń aıǵaqtary, saraptama qorytyndylary jáne ózge de is materıaldary dálel boldy.
Prokýror júrgizýshini bes jylǵa bas bostandyǵynan aıyrý jazasyn taǵaıyndaýdy suraǵan. Jábirlenýshilerdiń biri qatalyraq jaza qoldanýdy talap etse, qalǵandary aıyptaýshy taraptyń ustanymymen kelisken.
Sot júrgizýshini QR Qylmystyq kodeksiniń 345-babynyń 4-bóligi boıynsha — «Jol júrý erejelerin buzý, abaısyzda jeti adamnyń ólimine ákep soqtyrý» babymen kináli dep tanydy. Úkim shyǵarý kezinde sot aıyptalýshynyń kámeletke tolmaǵan balasy bar ekenin jáne onyń shyn nıetpen ókinip otyrǵanyn eskerdi.
Nátıjesinde er adam bes jylǵa bas bostandyǵynan aıyrylyp, jazasyn eń tómengi qaýipsizdik deńgeıindegi túzeý mekemesinde óteıtin boldy. Sonymen qatar ol jeti jyl merzimge kólik quralyn basqarý quqyǵynan aıyryldy.
Úkim zańdy kúshine engen joq.