Qaraǵandy oblysynda jasandy ıntellekt azyq-túlik baǵasyn baqylaýǵa kómektesedi
QARAǴANDY. KAZINFORM – Qaraǵandy oblysynda tsıfrlyq sheshimder kólik, turǵyn úı-kommýnaldyq sharýashylyǵy jáne basqa da salalarǵa engizilýde. Áleýmettik salada neırondyq jelini qoldanatyn «Azyq-túlik baǵasyn monıtorıngteý» jobasy iske qosyldy.
Bul týraly «Jasandy ıntellekt dáýirindegi Qazaqstan: ózekti mindetter jáne olardy tsıfrlyq transformatsııa arqyly sheshý» taqyrybyndaǵy Joldaýdy talqylaý jıynynda aıtyldy.
— Memleket basshysy óz Joldaýynda jasandy ıntellektti ekonomıkanyń barlyq salasyna engizý jáne jappaı tsıfrlandyrý mindetin qoıdy. Osy maqsatta óńirde halyqtyń ómir súrý deńgeıin arttyrýǵa jáne áleýmettik turaqtylyqty qamtamasyz etýge baǵyttalǵan birqatar mańyzdy jobalar júzege asyrylyp jatyr, — dedi aqparattandyrý, memlekettik qyzmetter kórsetý jáne arhıvter basqarmasynyń basshysy Konstantın Ilnıtskıı.
Ol áleýmettik mańyzy bar azyq-túlik taýarlarynyń baǵasyn avtomatty túrde jınaý jáne taldaý júıesiniń qalaı jumys isteıtinin túsindirdi. Neırondyq jeli derekterdi negizinen óńirlik saýda jelileriniń saıttarynan jınaıdy. Alynǵan aqparat jedel sholýlar men taldamalyq esepter túrinde usynylady, bul baǵa ózgeristerine jedel áreket etýge jáne tutyný naryǵyndaǵy jaǵdaıdy tereń taldaýǵa múmkindik beredi.
— Búginde janar-jaǵarmaı baǵasyn avtomatty jınaý, baqylaýǵa alynatyn taýarlar tizimin keńeıtý, sondaı-aq barlyq saýda núkteleri men taýar túrlerin qamtýǵa múmkindik beretin kassalyq chekter derekterin ıntegratsııalaý jumysy júrgizilýde. Bul naqty ortasha tutynýshylyq sebetti qalyptastyrýǵa jol ashady, — dep tolyqtyrdy Konstantın Ilnıtskıı.
Spıkerdiń aıtýynsha, kólik salasynda da pılottyq rejımde joldardyń jaǵdaıyn avtomatty baqylaý júıesi — JoLScan iske qosylǵan. Kompıýterlik kórý avtomobılderdegi beınetirkegishterdiń vıdeojazbalaryn taldap, jol tósemindegi aqaýlardy anyqtaıdy jáne olardy vektorlyq belgiler arqyly salystyra otyryp, tarıhyn qadaǵalaıdy. Sonymen qatar geolokatsııa arqyly olqylyqtar kartaǵa túsiriledi.
Júıeniń kómegimen jedel aralasýdy qajet etetin bes syndarly aımaq anyqtaldy.
Taǵy bir tsıfrlyq sheshim kólik keptelisterimen kúreske baǵyttalǵan. Intellektýaldy platforma baǵdarshamdardyń jumysyn baqylap, rettep otyrady. Bul ásirese tańerteńgi jáne keshki qarbalas ýaqytta mańyzdy.
Sonymen qatar «Taza Qazaqstan» ulttyq jobasy aıasynda jasyl ekpelerdi túgendeýge arnalǵan mobıldi qosymsha ázirlendi. Júıe nysandardyń koordınattaryn, sıpattamasyn jáne fotosýretterin tirkeıdi, al bul derekter kompıýterlik kórý jáne jasandy ıntellekt tehnologııalary arqyly óńdeledi.
Oblys ákimi Ermaǵanbet Bólekpaev osy jumysty jalǵastyryp, óńirdiń barlyq salasynda tsıfrlandyrý men jasandy ıntellektti engizýdi qamtamasyz etýdi tapsyrdy.
Eske sala ketsek, Memleket basshysy Joldaýynda tsıfrlandyrý men jasandy ıntellektti damytýǵa arnalǵan biryńǵaı tujyrymdamalyq qujat — Digital Qazaqstan ázirleýdi tapsyrǵan bolatyn.