Qaraǵandy oblysynda janyp jatqan úıden 8 gaz ballony shyǵaryldy
ASTANA. KAZINFORM — Qaraǵandy oblysy Novodolınskıı kentinde jeke turǵyn úı men oǵan japsarlas salynǵan úsh sharýashylyq qurylysta órt shyqty. Bul týraly TJM málim etti.
Oqıǵa ornyna TJM kúshteri jedel jetti. Alǵashqy bólimsheler kelgen kezde turǵyn úı ishindegi aǵash konstrýktsııalar, jıhaz ben turmystyq zattardyń janyp jatqany anyqtaldy. Sondaı-aq sharýashylyq qurylystarynyń biriniń jabyndysy 15 sharshy metr aýmaqta opyrylǵan.
— Órtti sóndirý barysynda ashyq jalynǵa, qoıý tútin men joǵary qaýipke qaramastan, TJM qutqarýshylary janyp jatqan aýmaqtan kólemi 27 lıtr bolatyn 8 gaz ballonyn jedel túrde syrtqa shyǵaryp, yqtımal jarylystyń aldyn aldy, — delingen TJM habarlamasynda.
Órt tolyq sóndirildi. Zardap shekkender joq. Órttiń shyǵý sebebi anyqtalyp jatyr.
Buǵan deıin ShQO-da órtengen jer úıden áıel adamnyń denesi tabylǵanyn jazdyq.
