Qaraǵandy oblysynda jańǵyrtýdan ótken úsh temirjol vokzaly paıdalanýǵa berildi
ASTANA. KAZINFORM - Qaraǵandy oblysynda vokzaldardy jańǵyrtý baǵdarlamasy aıasynda Nura, Qaraǵandy-Suryptaý jáne Jańa Qaraǵandy stantsııalaryndaǵy temirjol vokzaldary, sondaı-aq Shet aýdanyndaǵy Aısa stantsııasynyń jolaýshylar platformasy paıdalanýǵa berildi.
QR Kólik mınıstrligi baspasóz qyzmetiniń habarlaýynsha, Memleket basshysynyń tapsyrmasy boıynsha iske asyrylyp jatqa baǵdarlamaǵa oblystan 14 temirjol vokzaly men jolaýshylar platformasy engen bolatyn. Búgin paıdalanýǵa berilgen nysandar alǵashqylardyń biri. Joba jolaýshylarǵa kórsetiletin qyzmet sapasyn arttyrýǵa, qolaıly jaǵdaı jasaýǵa jáne kólik ınfraqurylymyn zamanaýı talaptarǵa saı jańǵyrtýǵa baǵyttalǵan.
Jumys barysynda ǵımarattyń qasbeti men ishki úı-jaılary tolyq jańartyldy, ınjenerlik jeliler, jylytý, sýmen jabdyqtaý jáne elektrmen jabdyqtaý júıeleri jańǵyrtyldy. Vokzalda zamanaýı kútý aımaqtary jasalyp, navıgatsııa jaqsartyldy, júrip-turýy shekteýli azamattar úshin qolaıly jaǵdaılar qamtamasyz etildi.
Jańǵyrtylǵan mańyzdy nysandardyń biri – 1965 jyly salynǵan Qaraǵandy-Suryptaý stantsııasynyń vokzaly. Uzaq jyldar paıdalanylǵan ǵımarat keshendi jańartýdy qajet etti. Búginde vokzal tolyqtaı jańǵyrtylyp, zamanaýı talaptarǵa sáıkes keltirildi. Bul stantsııa arqyly táýligine 21 jolaýshylar poıyzy qatynaıdy.
- Óńirde temirjol ınfraqurylymyn jańǵyrtý jumystary jalǵasyp jatyr. Jazdyń sońyna deıin Balqash-2, Moıynty, Aqadyr, Darııa, Jaryq, Myrza jáne Sarybel stantsııalaryndaǵy vokzaldardy, sondaı-aq Temirtaý men Saryshaǵan stantsııalaryndaǵy jolaýshylar platformalaryn qaıta jańǵyrtý jumystaryn aıaqtaý josparlanyp otyr,-delingen habarlamada.
Jalpy, Qazaqstan boıynsha jańǵyrtý baǵdarlamasy aıasynda 124 temirjol vokzaly qaıta jańartylyp jatyr. Bul jumystar kólik qyzmetteriniń sapasyn arttyrýǵa, óńirlik ınfraqurylymdy damytýǵa jáne jolaýshylar úshin qolaıly ári qaýipsiz jaǵdaı jasaýǵa baǵyttalǵan.
Osyǵan deıin elimizdiń úsh óńirinde jańartylǵan bes temirjol vokzaly ashylǵan bolatyn.
