Qaraǵandy oblysynda jabyq jol ýchaskelerinen 600-den astam kólik qaýipsiz jerge shyǵaryldy
QARAǴANDY. KAZINFORM — Qaraǵandy oblysynda aýa raıynyń kúrt nasharlaýyna baılanysty jabylǵan avtojoldardan polıtsııanyń uıymdasqan súıemeldeýimen 600-den astam kólik qaýipsiz aımaqtarǵa jetkizildi.
Respýblıkalyq mańyzy bar avtojoldarda kóktaıǵaq pen qolaısyz meteojaǵdaı saldarynan qozǵalys qıyndap, kólik keptelisi qalyptasty.
Qaýipsizdikti qamtamasyz etý maqsatynda Qaraǵandy oblysyndaǵy respýblıkalyq mańyzy bar avtojoldarda kólik qozǵalysy ýaqytsha shekteldi. Aýa raıynyń kúrdelenýine baılanysty Qaraǵandy — Balqash jáne Balqash — Qaraǵandy baǵyttarynda 600-den astam kólik jınaldy.
Júrgizýshiler men jolaýshylardyń qaýipsizdigin qamtamasyz etý úshin Qaraǵandy oblysy Polıtsııa departamentiniń patrýldik polıtsııa batalony men aýmaqtyq bólimshelerdiń kúshteri jumyldyryldy. Polıtsııa qyzmetkerleri kólikterdi kezeń-kezeńimen uıymdasqan túrde súıemeldep, joldyń eń qaýipti bólikterinen shyǵaryp otyrdy.
Qaraǵandy oblysy PD bastyǵynyń orynbasary Jasqaırat Qaıyrovtyń aıtýynsha, osy kezeńde polıtsııanyń jeke quramy jol qaýipsizdigin qamtamasyz etýge basymdyq bere otyryp, kúsheıtilgen rejımde qyzmet atqardy.
— Bizdiń negizgi mindetimiz — azamattardyń ómiri men densaýlyǵyn saqtaý, sondaı-aq avtojoldarda tótenshe jaǵdaılardyń aldyn alý. Osy baǵytta barlyq qajetti sharalar qabyldanyp jatyr, — dep atap ótti ol.
Shekteý engizilgen ýaqytta keıbir azamattar narazylyq bildirgenimen, polıtsııa qyzmetkerleri qozǵalysqa tyıym salý tek qaýipsizdik maqsatynda engiziletinin túsindirdi.
— Resmı shekteýlerge qaramastan, jabyq jol ýchaskelerine shyǵýǵa áreket jasaǵan jaǵdaılar anyqtaldy. Mundaı áreketter adamdardyń ómiri men densaýlyǵyna tikeleı qaýip tóndiredi, — dedi Jasqaırat Qaıyrov.
Demalys kúnderi jabyq jolǵa shyqqany úshin tórt júrgizýshi ákimshilik jaýapkershilikke tartyldy.
Polıtsııa departamentinde bul máselege qatysty ustanym ózgerissiz bolatynyn atap ótti: engizilgen shekteýlerdi elemeýdiń kez kelgen faktisi qatań túrde toqtatylyp, quqyq buzýshylar zańnamaǵa sáıkes ákimshilik jaýapkershilikke tartylady.
Buǵan deıin elimizdiń birneshe óńirinde avtokóliktiń barlyq túri úshin qozǵalysqa shekteý engizilgeni habarlanǵan bolatyn.
Vıdeo: Qaraǵandy oblysy PD baspasóz qyzmeti