Qaraǵandy oblysynda zańsyz qazylǵan úsh karer anyqtaldy
ASTANA. KAZINFORM- Qarjylyq monıtorıng agenttiginiń Qaraǵandy oblysy boıynsha departamenti Balqash qalasyna qarasty Saıaq aýylynyń mańynda temir men marganets kenin zańsyz óndirýdi toqtatty.
Agenttiktiń baspasóz qyzmetiniń habarlaýynsha, tergeý deregine sáıkes, zańsyz ken óndirýdi «Vertex Co.» jáne «MiningMetall» JShS dırektory uıymdastyrǵan. Qazyp alynǵan topyraqtyń jalpy kólemi 338 myń tekshe metrge jetken. Búlingen jerdi qalpyna keltirip, karerlerdi qaıta óńdeýge jaramdy kúıge keltirý úshin 485 mln teńge qajet.
Ken óndirý jumystary jer qoınaýyn paıdalanýǵa tıisti quqyqsyz jáne qajetti ruqsat qujattarynsyz júrgizilgen. Jumysqa jaldamaly jumysshylar men ekskavatorlar, tıegishter, ken usatatyn qondyrǵy jáne samosvaldar sııaqty arnaıy tehnıkalar tartylǵan.
Óndirilgen ken usatylyp, keıin syrtqa shyǵarý jáne satý úshin temirjol stantsııasyna jetkizilip otyrǵan.
-Tekserý barysynda jerdiń ústińgi qabaty aýqymdy kólemde arshylyp, ken qazylǵan úsh karer anyqtaldy. Sottyń ruqsatymen eki arnaıy tehnıkaǵa, bir avtokólikke jáne kommertsııalyq úı-jaıǵa tyıym salyndy. Kúdiktige kepil túrindegi bultartpaý sharasy qoldanyldy,-delingen habarlamada.
Tergeý jalǵasyp jatyr. Qazaqstan Respýblıkasy Qylmystyq-protsestik kodeksiniń 201-babyna sáıkes ózge málimetter jarııa etilmeıdi.
Osyǵan deıin QMA Jetisý oblysynda 1,5 mlrd teńgelik altyn quramdy kendi zańsyz áketý áreketin toqtatqan bolatyn.
