Qaraǵandy oblysynda zańsyz berilgen úsh orman alqaby memleketke qaıtaryldy

QARAǴANDY. KAZINFORM - Qaraǵandyda jerdi qaıtarý boıynsha sharalar qabyldanyp, ekologııa salasyndaǵy qylmystyq is boıynsha tergeý bastaldy. Bul týraly Qaraǵandy oblysynyń prokýratýrasynda ekologııa salasyndaǵy zańdylyqtyń saqtalý máseleleri boıynsha ótken alqa otyrysynan málim boldy.

Otyrysty ashqan oblys prokýrory Baýyrjan Myrzakerov óńir úshin ekologııalyq qaýipsizdik pen qorshaǵan ortany qorǵaýdyń mańyzdylyǵyn atap ótti.

Prokýratýra júıeli sheshimderdi talap etetin tabıǵatty qorǵaý zańnamasyn buzýdyń eleýli faktilerin anyqtady. Atap aıtqanda, júzdegen mıllıard teńgege shyǵyn keltirgen zańsyz karerlerdiń jumysyn toqtatý boıynsha sharalar júrgizildi. Anyqtalǵan faktilerdiń biri boıynsha is qozǵalyp, 500 mıllıon teńgeniń múlki tárkilendi.

Orman jáne sý zańnamasyn qorǵaýǵa erekshe kóńil bólinedi. Prokýrorlar jeke menshikke zańsyz berilgen úsh orman alqabyn qaıtardy, olardyń quny 340 mıllıon teńgeni qurady.

Otyrys barysynda jer qoınaýyn paıdalaný salasyndaǵy ruqsat berý rásimderin jetildirý, tazartý qurylǵylaryn jańǵyrtý jáne qoqys polıgondaryn joıý máseleleri qaraldy.

- Alqa qorytyndysy boıynsha ýákiletti organnyń atyna prokýrorlyq qadaǵalaý aktisi engizildi. Ekologııalyq jaǵdaıdy jaqsartýǵa, memlekettik organdardyń ózara is-qımylyn nyǵaıtýǵa jáne óńirdiń tabıǵı resýrstaryn tıimdi paıdalanýǵa baǵyttalǵan usynystar ázirlendi, - delingen habarlamada.

Osyǵan deıin Qaraǵandy oblysynda prokýratýra aralasqannan keıin 9 aýyl taza sýǵa qol jetkizgeni týraly jazdyq.