Qaraǵandy oblysynda zańsyz aýlanǵan 53 keliden astam kókserke tárkilendi
ASTANA. KAZINFORM — Qaıyq ishinde 42 jáne 44 jastaǵy eki jergilikti turǵyn bolǵan. Tekserý kezinde polıtseıler uzyndyǵy 300 metr tyıym salynǵan sıntetıkalyq balyq aýlaý torlaryn jáne zańsyz aýlanǵan 53 keliden astam kókserkeni anyqtap, tárkiledi.
Qaraǵandy oblysynda tabıǵatty qorǵaý zańnamasynyń saqtalýyn qamtamasyz etýge baǵyttalǵan «Brakoner» jedel-profılaktıkalyq is-sharasy bastaldy. 26 tamyzdan beri polıtseıler sý aıdyndarynda zańsyz balyq aýlaý faktileriniń jolyn kesýge baǵyttalǵan reıdtik jumystar júrgizýde.
Іs-sharanyń alǵashqy nátıjesi Balqash kóliniń akvatorııasynda tirkeldi. Birlesken reıd barysynda Qaraǵandy oblysynyń tabıǵatty qorǵaý polıtsııasy men Balqash jelilik polıtsııa bóliminiń qyzmetkerleri motorly qaıyqty toqtatty.
Qaıyq ishinde 42 jáne 44 jastaǵy eki jergilikti turǵyn bolǵan. Tekserý kezinde polıtseıler uzyndyǵy 300 metr tyıym salynǵan sıntetıkalyq balyq aýlaý torlaryn jáne zańsyz aýlanǵan 53 keliden astam kókserkeni anyqtap, tárkiledi.
Aldyn ala esep boıynsha, zańsyz balyq aýlaý saldarynan Balqash kóliniń ekojúıesine 450 myń teńgeden astam zalal keltirilgen.
Atalǵan fakti boıynsha ustalǵan azamattarǵa qatysty sotqa deıingi tergeý bastaldy. Qaıyq, brakonerlik quraldar men aýlanǵan balyqtar qylmystyq is boıynsha zattaı dáleldeme retinde tirkeldi.
Polıtsııa tabıǵı resýrstardy zańsyz paıdalanýdyń qorshaǵan ortaǵa orny tolmas zııan keltiretinin eske salady. Zańsyz balyq aýlaý faktilerin kórgen azamattardy quqyq qorǵaý organdaryna habarlaýǵa shaqyrady.
Aıta ketelik Almaty oblysynda 260 keli balyqty zańsyz aýlaǵan brakonerler sottalǵan edi.
