Qaraǵandy oblysynda zań buzǵan júk kólikterine 322,8 mln teńgege aıyppul salyndy
ASTANA. KAZINFORM – Qaraǵandy oblysynda aýyr júk kólikteriniń qozǵalysyna baqylaý kúsheıtilip, birqatar zańbuzýshylyq anyqtaldy.
QR Kólik mınıstrliginiń málimetinshe, óńirde kóliktik baqylaý sharalary aıasynda aýmaqtyq ınspektsııa jergilikti atqarýshy organdarmen birlesip 53 karerdi teksergen. Nátıjesinde 27 nysanda ǵana salmaq ólsheý jabdyqtary bar ekeni anyqtalǵan.
– Karer ıelerine kólik zańnamasynyń talaptaryn saqtaý, onyń ishinde salmaq ólsheý qurylǵylaryn ornatý qajettiligi týraly habarlamalar joldandy. Sonymen qatar karerlerdi pasporttaý týraly sheshim qabyldandy. Bul olardyń tehnıkalyq jabdyqtalýyn naqty anyqtaýǵa múmkindik beredi, – delingen habarlamada.
Jyl basynan beri júk jóneltýshilerge qatysty 22 profılaktıkalyq baqylaý sharasy ótkizilgen. Sondaı-aq oblysta 6 avtomattandyrylǵan ólsheý stantsııasy (AÓS) jumys isteıdi, onyń 5-eýi respýblıkalyq, 1-eýi jergilikti mańyzy bar joldarda ornalasqan.
– AÓS júıesi arqyly 2595 ólsheý júrgizilip, nátıjesinde 683 nusqama shyǵaryldy. Aıyppuldardyń jalpy somasy 322,8 mln teńgeden asty. Reıdtik is-sharalar barysynda 41 avtokólik tekserilip, 29 jaǵdaıda salmaq normasynyń asyp ketkeni anyqtaldy. 53 ákimshilik hattama toltyryldy, – dep habarlady vedomstvo.
2026 jyly óńirde taǵy 3 avtomattandyrylǵan ólsheý stantsııasyn ornatý josparlanyp otyr. Al 2028 jylǵa deıin respýblıkalyq joldarda qosymsha 7 stantsııa iske qosylady.
Aıta keteıik, aýyr júk kólikterine baqylaýdy kúsheıtý joldardyń tozýyn azaıtyp, kólik ınfraqurylymynyń saqtalýyn qamtamasyz etýge baǵyttalǵan.
Elordada da júk kólikteriniń qozǵalysy qatań baqylaýǵa alynǵany habarlandy.
