Qaraǵandy oblysynda veterınarlar jańa otandyq vaktsınany synap kóredi
QARAǴANDY. KAZINFORM - Qazaqstandyq ǵalymdar afrıkalyq sapqa qarsy alǵashqy vaktsınany oılap tapty. Ony Qaraǵandy oblysynyń mal dárigerleri birinshi bolyp synap kóredi. Halyq arasynda bul ınfektsııa epızootııalyq lımfangıt degen ataýmen tanymal. Bul dertke negizinen jylqylar shaldyǵady, dep habarlaıdy Kazinform tilshisi.
Epızootııalyq lımfangıt Buqar Jyraý jáne Qarqaraly aýdandaryndaǵy jylqylarǵa juqqan. Úmitker jáne Yntymaq aýyldyq okrýgterinde karantın jarııalandy.
Buǵan deıin oblystyń veterınarlyq qyzmetinde Úmitker aýylynda epızootııalyq lımfangıt taraýyna baılanysty karantın ótken jyldyń mamyr aıynan bastap búgingi kúnge deıin qoldanylyp kele jatqany habarlanǵan bolatyn. Osy ýaqyt aralyǵynda 185 janýar joıyldy.
Jýyrda bul ınfektsııa kórshiles aýyldarǵa – Tórtkól men Úlgige tarady. Bul eldi mekenderde 20-dan astam jylqy dertke shaldyqqan. Jylqy ıeleri janýarlardyń aıaqtarynda irińdi jaralardy baıqaǵan. Sodan keıin, fermerlerdiń aıtýynsha, jaralar jylqynyń búkil denesine tarap ketedi eken.
Buǵan deıin Qazaqstanda afrıkalyq sapqa (sap - Burkholderia mallei bakterııasy týdyratyn aýyr ınfektsııalyq aýrý) qarsy vaktsına bolmaǵan. Alaıda, otandyq ǵalymdar ınfektsııany jeńetin dári oılap tapty.
"Vaktsınany bizdiń ǵalymdar jasaǵan. Búgingi tańda ol Otar bıologııalyq qaýipsizdik máseleleri ǵylymı-zertteý ınstıtýtynda zerthanalyq synaqtardan ótti. Bul vaktsınany is júzinde synap kórýge daıynbyz. Biz karantındik aýmaqta jumys isteımiz. Aýa raıy múmkindik berse, janýarlardy vaktsınatsııalaýǵa kirisemiz", - deıdi QR AShM Veterınarııalyq baqylaý komıtetiniń Qaraǵandy oblystyq ınspektsııasynyń basshysy Erjan Beketbaev.
