Qaraǵandy oblysynda úıirli shegirtkege qarsy fıtosanıtarııalyq sharalar júrgizilip jatyr

QARAǴANDYDA. KAZINFORM -  2025 jyly Qaraǵandy oblysynyń aýmaǵynda asa qaýipti jáne qaýipti zııandy organızmderge qarsy zertteý jumystaryn 5,4 mln gektar aýmaqta júrgizý josparlanǵan. Bul týraly AShM baspasóz qyzmeti habarlady. 

— Onyń ishinde úıirli shegirtke zııankesterine — 1 264,07 myń gektar aýmaq. Monıtorıngtik zertteýler sáýir aıynda bastalyp, qazirgi tańda 237,29 myń gektar zerttelip, onyń 8,582 myń gektarynda shegirtkelerdiń qonystanýy tirkeldi, — delingen AShM habarlamasynda.

Fıtosanıtarııalyq monıtorıng pen óńdeý jumystaryna barlyǵy 136 adam jumyldyrylǵan. Bul qatarda «Respýblıkalyq fıtosanıtarııalyq dıagnostıka jáne boljamdar ortalyǵy» mamandary, ýaqytsha anyqtaýshylar, jergilikti atqarýshy organdar ókilderi men ınspektorlar bar.

— Bıyl alǵash ret pılottyq rejımde bir konkýrs arqyly pestıtsıdterdi satyp alý, tasymaldaý, hımııalyq óńdeý jáne zalalsyzdandyrý jumystary uıymdastyrylýda. Sonymen qatar, shegirtkelerge qarsy kúreste agrodrondar qoldanylyp jatyr. Úıirli shegirtke — ıtalıandyq prýsqa qarsy hımııalyq óńdeý jumystary 59 300 gektar aýmaqty qamtıdy. Qazirgi tańda 4 502 gektar jer óńdeldi. Atap aıtqanda, Aqtoǵaı, Qarqaraly jáne Shet aýdandarynda asa jeńil avıatsııa, agrodrondar jáne jer ústi búrikkishteri arqyly óńdeý jumystary júrgizilip jatyr, — delingen habarlamada.

Jumystar mamyr–shilde aralyǵynda jalǵasady. Fıtosanıtarııalyq ahýal turaqty baqylaýda. 

Aıta ketelik Qyzylorda oblysy Aral aýdanynyń eldi mekenderinde shegirtke qaptap ketkenine baılanysty mınıstrlik jaýap bergen edi.