Qaraǵandy oblysynda úsh jasar balanyń qazasynan keıin mádenıet úıiniń jumysy ýaqytsha toqtatyldy
QARAǴANDY. KAZINFORM — Qaraǵandy oblysynyń Buqar jyraý aýdanyndaǵy Botaqara kentinde turatyn áıel úsh jasar ulynyń ústine sáýir aıynda ǵımarattyń qaptama kirpishi qulaǵannan keıin mádenıet úıiniń nelikten jumysyn jalǵastyrǵanyn túsindirýdi talap etip otyr. Mekemeniń qyzmetin ýaqytsha toqtatý týraly sheshim tek qazan aıynda, qaıǵyly oqıǵadan keıin jáne ǵımaratqa saraptama júrgizý kezeńinde qabyldanǵan.
Qaıtys bolǵan Ámirdiń anasy Sábına Kaýapova Qaraǵandy oblysynyń Botaqara kentindegi Mádenıet úıiniń qaýipsizdigine qatysty jaýapty organdarǵa kópshilik aldynda saýal joldady. Áıeldiń aıtýynsha, ǵımarattyń qasbetine qatysty oqıǵaǵa qaramastan, mekeme kelýshilerdi, onyń ishinde balalardy da qabyldaýdy jalǵastyrǵan.
Qaıǵyly oqıǵa 13 sáýirde bolǵan. Buǵan deıin habarlanǵandaı, ǵımarattyń qaptama materıalynyń bir bóligi úsh jasar balanyń basyna qulaǵan.
Saldarynan bala bas-mıynyń aýyr jaraqatyn alyp, medıtsınalyq mekemege jetkizilgen. Oqıǵaǵa baılanysty polıtsııa qaýipsizdik talaptaryna saı kelmeıtin jumystardy oryndaý nemese qyzmetter kórsetý faktisi boıynsha qylmystyq is qozǵaǵan. Sol kezde aýdan ákimdigi balaǵa qajetti medıtsınalyq kómek kórsetilip jatqanyn habarlap, tergeý oqıǵanyń barlyq mán-jaıyn jáne oǵan jaýapty tulǵalardyń yqtımal kinásin anyqtaýǵa tıis ekenin málimdegen.
Anasynyń aıtýynsha, aýyr jaraqat alǵannan keıin Ámir jansaqtaý bóliminde úsh aı boıy komada jatqan. Alaıda balanyń ómirin saqtap qalý múmkin bolmaǵan.
Endi áıeldi mádenıet úıine kelýshilerdiń qaýipsizdigin qamtamasyz etý sharalary nelikten erterek qabyldanbaǵany alańdatady. Onyń sózinshe, oqıǵadan keıingi jarty jylǵa jýyq ýaqyt aralyǵynda mekeme jumysyn jalǵastyra bergen, al qaptama materıaly qulaǵan qaýipti aýmaq tek eskertý lentasymen qorshalǵan.
— Osy ýaqyt ishinde ǵımarattyń qaýipsiz ekeni anyqtalyp, saraptama júrgizilgenge deıin mádenıet úıiniń jumysy nege toqtatylmady? Kirpishtiń taǵy bireýdiń ústine qulamaıtynyna kim kepildik bere alady? Balalar bul mekemege kún saıyn kelip, qaýipti aýmaqtyń janynan ótedi. Olardyń qaýipsizdigin qamtamasyz etý úshin qorshaý lentasy jetkilikti me? — dep ashynady qaza tapqan balanyń anasy.
Sábına Kaýapovanyń aıtýynsha, oǵan mádenıet úıin jabý múmkin emes dep túsindirgen. Áıel basqa balalardyń ómiri men densaýlyǵyna qaýip tóndirmeý úshin mekemeniń jumysyn tym bolmasa ýaqytsha toqtatýdy suraǵan.
Ol quzyrly organdardan mekeme qyzmetiniń nelikten erterek toqtatylmaǵanyn túsindirýdi jáne tıisti sharalardyń qabyldanýyna qol jetkizý úshin qaıda júginý kerektigin aıtýdy surap otyr.
Buqar jyraý aýdanynyń mádenıet jáne tilderdi damytý bóliminiń basshysy Meıirlan Qalı Botaqara kentindegi mádenıet úıiniń qyzmeti aýdandyq polıtsııa bóliminiń 2026 jylǵy 14 qazandaǵy qaýlysy negizinde ýaqytsha toqtatylǵanyn habarlady.
— Ǵımarattyń qasbetinen qaptama materıalynyń qulaýyna baılanysty oryn alǵan qaıǵyly oqıǵaǵa oraı aýdandyq mádenıet jáne tilderdi damytý bóliminiń qaramaǵyndaǵy Botaqara kentindegi mádenıet úıiniń qyzmeti aýdandyq polıtsııa bóliminiń 2026 jylǵy 14 qazandaǵy qaýlysy negizinde ýaqytsha toqtatyldy. Qazirgi ýaqytta ǵımarattyń tehnıkalyq jaı-kúıine saraptamalyq tekserý júrgizilip jatyr. Saraptama qorytyndysy alynǵanǵa deıin qyzmetkerler men basqa da azamattardyń ǵımaratqa kirýine tolyq tyıym salyndy, — dedi Meıirlan Qalı.
Qazir ǵımarat saraptama qorytyndysy alynǵanǵa deıin jabyq bolady. Saraptama nátıjeleri men mekemeniń aldaǵy taǵdyry týraly ázirshe aqparat joq.
