Qaraǵandy oblysynda túrmede sottalǵandardy qorlaǵan qyzmetkerler jazalandy - QAJD

   Qaraǵandy oblysy boıynsha Qylmystyq atqarý júıesi departamenti (QAJD) kolonııa qyzmetkerleriniń sottalǵandardy qorlaý faktisin rastady. Departament basshylyǵy tergeý júrgizip, qyzmetkerler jaýapqa tartyldy, dep habarlaıdy Kazinform agenttiginiń tilshisi.

 Áleýmettik jelilerde Qaraǵandy oblysyndaǵy kolonııada túsirilgen vıdeo tarady. Kadrlarda qyzmetkerlerdiń sottalǵandardy qorlap jatqanyn kórýge bolady. QAJD bul faktini rastady.

«QAJD №31 mekemesiniń qyzmetkerleri men sottalǵandardyń Qaraǵandy jáne Ulytaý oblysy boıynsha zańsyz áreketteri týraly beınejazbalardy taratý faktisi bolǵanyn habarlaıdy. Qyzmettik tergeý júrgizildi, qyzmetkerler jaýapqa tartyldy»,- dep habarlady QAJD Qaraǵandy oblysy men Ulytaý oblysy boıynsha baspasóz qyzmeti.

Jalǵan aqparattyń taralýyna jol bermeý úshin quqyq qorǵaý uıymdary ókilderi mekemege bardy. Sonymen qatar, QAJ departamentiniń basshylyǵy tekseris qorytyndysy boıynsha sottalǵandardyń týystarymen kezdesti.

«Qazirgi ýaqytta mekemedegi jaǵdaı turaqty jáne QAJD basshylyǵynyń baqylaýynda», - dep tolyqtyrdy vedomstvonyń baspasóz qyzmeti.