Qaraǵandy oblysynda týrıstik ındýstrııalyq aımaq qurylady

ASTANA. KAZINFORM – Endi Qaraǵandy oblysynda týrızm salasy da qarqyndy damıdy. Ol úshin oblys ákimdigi áýejaılardy qaıta jańǵyrtyp, týrıstik ındýstrııalyq aımaq salýdy josparlap otyr. 

– Qaraǵandy men Balqash áýejaılaryn damytý jumystary júrip jatyr. Qaraǵandy áýejaıy júk termınaly retinde qaıta jańǵyrady. Al Balqash áýejaıynyń rekonstrýktsııasy aıaqtalýǵa jaqyn. Bul joba áýejaıdyń ótkizý qabiletin saǵatyna 80 jolaýshyǵa deıin arttyryp, Balqashtan ushatyn áýe baǵyttarynyń geografııasyn keńeıtýge múmkindik beredi, - deıdi Qaraǵandy oblysynyń ákimi Ermaǵanbet Bólekbaev Ortalyq kommýnıkatsııalar qyzmetinde ótken baspasóz konferentsııasynda.

Jaqynda oblysta týrıstik ındýstrııalyq aımaq qurylady.

– Qyzmet kórsetý salasynyń mańyzdy baǵyty – týrızm. Prezıdenttiń tapsyrmasy boıynsha, ÁKK tetigi arqyly Balqashta ınvestorlarǵa shıpajaı men qonaqúı salý úshin eki jer telimi berildi. Týrıstik ındýstrııalyq aımaq qurý jumystary bastaldy. Jer telimi anyqtaldy, tujyrymdama ázirlenip jatyr. Avtojol tóselip, elektr jáne sý júıeleri tartylǵan, - deıdi aımaq basshysy.

Týrızm salasyn damytý aıasynda joldardyń da sapasy birshama jaqsardy.

– Qaraǵandy – Balqash avtojolynyń rekonstrýktsııasy qala arasyndaǵy kólikterdiń erkin qatynaýyn edáýir jaqsartyp, bolashaq ındýstrııalyq aımaqty ınvestorlar úshin odan ary tartymdy etti, - deıdi oblys ákimi.

Balqashtan bólek, óńirdiń taǵy bir týrıstik baǵyty – Qarqaraly.

– «Buǵyly» demalys aımaǵyn damytyp jatyrmyz. Injenerlik jeliler tartý jumystary da júrgizilip jatyr. Investorlarǵa qonaqúı jáne demalys aımaqtaryn salý úshin 75 gektar jer usynylady, - deıdi Ermaǵanbet Bólekbaev.

Jalpy, bıyl oblystaǵy týrızm salasyn damytýǵa 19 mlrd teńge ınvestıtsııa salynǵan. Oblys ákimdigi jyl sońyna deıin bul kórsetkish 23 mıllıard teńgege deıin ósýi múmkin ekenin aıtady. Qaraǵandy oblysyna saparlaǵan týrıster sany 29 paıyzǵa artyp, jarty jyl ishinde 200 myńǵa jetken.