Qaraǵandy oblysynda turǵyndarǵa sý tasqynynan búlingen múlik pen ólgen malǵa ótemaqy tolyq berildi

ASTANA. KAZINFORM – Qaraǵandy oblysynda turǵyndarǵa sý tasqynynan búlingen múlik pen ólgen malǵa ótemaqy tolyq berildi. Bul týraly Qaraǵandy oblysy ákiminiń orynbasary Baýyrjan Asanov aıtty.

«Oblysymyzdyń 4 aýylynda 60 úı sý tasqynynan zardap shekken bolatyn. Sondaı-aq 89 bas aýyl sharýashylyǵy janýary shyǵyn boldy. Veterınarııalyq-sanıtarlyq normalardy saqtaı otyryp, shyǵyn bolǵan barlyq mal bas mal qorymynyń aýmaǵynda órteý arqyly joıyldy. Sý tasqynynan zardap shekken 60 otbasyna 100 AEK mólsherinde birjolǵy áleýmettik tólem tólendi. Sonymen qatar zaqymdanǵan jeke múlikterdiń ótemaqysy tolyǵymen óteldi jáne shyǵyn bolǵan maldyń orny toltyryldy», - dedi ákim orynbasary Ortalyq kommýnıkatsııalar qyzmetindegi brıfıngte. 

Onyń atap ótýinshe, akkredıttelgen uıym sý basqan nysandarǵa baǵalaý jáne tehnıkalyq tekserý júrgizdi. 

«Qazirdiń ózinde barlyq turǵyn úı men múlik nysandaryna qorytyndy berildi. 3 aýyldaǵy 6 úı apatty dep tanylǵan bolatyn. 5 otbasyǵa sol aýyldardan turǵyn úı satyp aldy. Bir otbasy qazirgi tańda qonystandy. Sondaı-aq 1 úı salynady. Qurylysqa jer ýchaskesin tańdaý aktisi júrgizildi. Úıdiń qurylysy kelesi aptadan bastalady. Qalǵan 54 úı jóndeýden ótedi. Bul jumystar úshin ótemaqy tólendi. Turǵyndar jóndeýdi ózderi jasaýǵa nıet bildirip otyr. Jeke múlik úshin de, úıdi jóndeý jáne salý úshin de ótemaqy boıynsha tólemderdiń barlyǵy somasy turǵyndarmen kelisilgenin atap ótken jón. Sý tasqyny saldaryn joıý jumysy jalǵasýda ári turaqty baqylaýda», - dedi Baýyrjan Asanov.