Qaraǵandy oblysynda tumaýǵa qarsy dári-dármek jetkilikti kólemde bar
ASTANA. KAZINFORM — Medıtsınalyq jáne farmatsevtıkalyq baqylaý komıtetiniń Qaraǵandy oblysy boıynsha departamenti óńirde dári-dármekpen qamtamasyz etilý jaǵdaıy turaqty ekenin habarlady.
JRVI men tumaýdy emdeýde qoldanylatyn preparattardyń negizgi toptarynyń bolýyna júrgizilgen monıtorıng nátıjeleri boıynsha tapshylyq baıqalmaıdy, dári-dármekterge suranystyń kúrt ósýi anyqtalmady.
Departament málimetteri boıynsha oblystaǵy dárihana qoımalary men dárihanalarynda, Qaraǵandy, Temirtaý jáne Balqash qalalaryn qosa alǵanda, barlyq negizgi vırýsqa qarsy preparattar, eresekter men balalarǵa arnalǵan qyzýdy túsiretin, sondaı-aq sımptomatıkalyq áser etetin preparattar bar.
— Búgingi kúni dárihana jelisiniń qamtamasyz etilýi turaqty deńgeıde. Negizgi vırýsqa qarsy preparattar, ıbýprofen jáne paratsetamol-quramdy dáriler, sonymen qatar qurama dáriler aýmaqtyń barlyq dárihanalarynda bar. Jaǵdaı tolyq baqylanady jáne tapshylyq baıqalmaıdy, — dep habarlady Departamentte.
Іri dıstrıbıýtorlarmen jetkizilim suraqtary pysyqtaldy, dárihana jelisin tolyqtyrý josparly rejımde júzege asyrylady.
Departament jeke pozıtsııalardyń qysqa merzimdi bolmaýy logıstıkalyq protsestermen, dári-dármekterdi jóneltýmen jáne qabyldaýmen baılanysty ekenin túsindiredi. Sonymen qatar, Departament mamandary dárihana jelisinde suranysqa ıe preparattardyń qoljetimdi analogtary bar ekenin eske salady. Tańdaý kezinde belsendi zatqa nazar aýdarý mańyzdy, qajet bolǵan jaǵdaıda — farmatsevtpen keńesý qajet.
— QR Densaýlyq saqtaý mınıstrliginiń dári-dármekterdiń qoljetimdiligi jónindegi saıasaty sheńberinde qazirgi ýaqytta keıbir preparattyń baǵasy tómendeý úrdisin kórsetip otyrǵanyn atap ótkimiz keledi. Atap aıtqanda, Sýmamed jáne Tsıprolet sııaqty bakterııaǵa qarsy preparattar halyq úshin qoljetimdi.Retseptsiz bosatylatyn dári-dármekterdiń (paratsetamol, ıbýprofen jáne t. b.) qunyna keletin bolsaq, olardyń baǵasy dárihanalar arasynda ár túrli bolýy múmkin. Memleket bul dári-dármekterge shekti baǵany belgilemeıdi, sondyqtan baǵa naryqtyq jaǵdaıǵa, dárihanalar arasyndaǵy básekelestikke jáne dárihana uıymdarynyń baǵa saıasatyna baılanysty qalyptasady, — dep túsindirdi vedomstvo ókilderi.
Dárihanalarda dári-dármekter men medıtsınalyq buıymdardyń bolýy men quny týraly aqparatty I-teka medıtsınalyq aqparattyq servısi arqyly (i-teka.kz veb-saıty, mobıldi qosymshasy, I-teka telefon anyqtamasy 8-708-808-74-74), Qaraǵandy qalasy dárihanalary anyqtamasynyń baılanys nómirleri boıynsha: 1333, 30-48-11, 8-707-173-96-75, nemese dárihana jelileriniń resmı saıttary arqyly bilýge bolady.
Budan buryn Qaraǵandy oblysynda maýsymdyq respıratorlyq ınfektsııalar boıynsha ahýal kúrdeli kúıinde qalyp otyrǵany málim boldy. Sanıtarııalyq-epıdemıologııalyq baqylaý departamentiniń jańartylǵan derekterine sáıkes, 1 qazan men 20 qarasha aralyǵynda óńirde 75 859 JRVI jaǵdaıy tirkelgen.