Qaraǵandy oblysynda Topar MAES-inde jańa týrbına iske qosyldy
QARAǴANDY. KAZINFORM – Qaraǵandy oblysynda energetıkalyq ınfraqurylymdy jańǵyrtý aıasynda iri joba júzege asty. Topar MAES-inde qýaty 130 megavatt bolatyn jańa týrboagregat paıdalanýǵa berildi. Bul qadam óńirdi senimdi energııamen qamtyp qana qoımaı, eldiń energetıkalyq qaýipsizdigin arttyrýǵa yqpal etpek.
Saltanatty rásimge Qaraǵandy oblysynyń ákimi Ermaǵanbet Bólekpaev pen QR Energetıka vıtse-mınıstri Suńǵat Esimhanov qatysty.
«Kazakhmys Energy» JShS bas dırektory Temirlan Ótegenovtiń aıtýynsha, joba memleket, bıznes jáne merdiger uıymdardyń birlesken eńbeginiń nátıjesinde júzege asqan.
– Búgin Memleket basshysynyń tapsyrmasyna sáıkes Topar MAES-in jańǵyrtý isin aıaqtadyq. Qýaty 130 megavatt bolatyn jańa týrbına iske qosylyp, Qaraǵandy oblysynyń energııa júıesiniń turaqty jumysyna jaǵdaı jasaldy. Joba eki jylǵa sozyldy, barlyq qıyn sátti eńserdik. Endi stantsııada aldaǵy jylytý maýsymyna tolyq rezerv bar. Sondaı-aq 2032 jylǵa deıingi damý jospary daıyn: Sankt-Peterbordaǵy «Sılovye mashıny» zaýytynan qosymsha eki týrbına satyp alyndy, Energetıka mınıstrligimen barlyq kelisimge qol qoıyldy, - dedi ol.
Óńir basshysy jańa jabdyqtyń aımaq úshin strategııalyq mańyzdylyǵyn atap ótti.
– Topar búginde zamanaýı energetıkalyq ortalyqqa aınalyp keledi. Qýaty 130 megavatt bolatyn jańa týrbına aımaqtyń óndiris oryndaryn turaqty energııamen qamtıdy. Osy atqarylǵan jumystar úshin «Qazaqmys» kompanııasyna alǵysymyzdy bildiremiz, - dedi Ermaǵanbet Bólekpaev.
Qaraǵandy GRES-2-niń operatsııalyq dırektory Andreı Solovev stantsııany kezeń-kezeńimen jańǵyrtý jumystaryna toqtaldy.
– Bıyl K–130-88 týrbınasy ornatyldy. Bul qosymsha 130 megavatt qýat beredi. Stantsııa 1962 jyldan beri jumys istep keledi, jabdyqtar tozǵan. Biz olardy birtindep jańartyp jatyrmyz: úsh mashına tolyq aýystyryldy. Sonyń arqasynda stantsııanyń jalpy qýaty 643 megavattan 773 megavatqa deıin artty, - dedi ol.
Jańa týrbınanyń iske qosylýy óńir energetıkasyn jańǵyrtýdaǵy mańyzdy kezeń boldy. Búginde Topar GRES-i senimdi jylý jáne elektr energııasymen qamtamasyz etýmen qatar, Qaraǵandy oblysynyń odan ári ónerkásiptik damýyna berik negiz qalyptastyryp keledi.
Osyǵan deıin Qaraǵandy JES-1 jylý tarıfin kóterýdi usynǵany jaıly habarlaǵan bolatynbyz.