Qaraǵandy oblysynda TikTok-ta beıádep sóz aıtqan áıel jaýapqa tartyldy
ASTANA.KAZINFORM – Áleýmettik jelilerge júrgizilgen monıtorıng barysynda polıtsııa qyzmetkerleri TikTok platformasynda jarııalanǵan beınejazbany anyqtady. Vıdeoda áıel adamnyń beıádep sózder aıtyp, ádep normalaryna qaıshy áreketter jasaǵany baıqalady.
Júrgizilgen is-sharalar nátıjesinde polıtseıler áıeldiń jeke basyn anyqtady. Ol – 1992 jyly týǵan Qaraǵandy oblysy Nura aýdanynyń turǵyny Dınara Makash. Ol polıtsııa bólimine jetkizildi.
Atalǵan derek boıynsha ákimshilik is qozǵalyp, sot sheshimimen Dınara Makashqa aıyppul salyndy.
Polıtsııa azamattardy áleýmettik jelilerde de ádep normalaryn saqtaýǵa jáne zań talaptaryn buzbaýǵa shaqyrdy. Quqyq buzýshylyqtardyń aldyn alý maqsatynda ınternet keńistigine monıtorıng júrgizý jumystary jalǵasady.
Aıta keteıik, Atyraýda TikTok-ta balaǵat sóz aıtqan qyzdyń anasy jaýapkershilikke tartyldy.
Aqtóbede er adam TikTok-ta balaǵat sóz aıtqany úshin qamaýǵa alyndy.
