Temirjolda qaza tapqan tórt jumysshynyń ólimine qatysty qylmystyq is qozǵaldy

QARAǴANDY. KAZINFORM — Tergeýshiler Moıynty — Shyǵanaq aralyǵyndaǵy temirjol ýchaskesinde mert bolǵan tórt jumyskerdiń qazasynyń sebebin anyqtap jatyr. Ulttyq kompanııa arnaıy komıssııa qurdy, al polıtsııa qylmystyq is qozǵady.

Qaraǵandy oblysynda temirjol jumysshylarynyń qaza bolýy faktisi boıynsha qylmystyq is qozǵaldy.

— Shý stantsııasyndaǵy jelilik polıtsııa bólimi temirjol kóligindegi qozǵalys qaýipsizdigi nemese paıdalaný erejelerin buzý saldarynan abaısyzda eki nemese odan da kóp adamnyń ólimine ákep soǵý baby boıynsha sotqa deıingi tergep-tekserýdi bastady, — dep habarlady Kóliktegi polıtsııa departamenti.

Qaıǵyly oqıǵa Shet aýdanynyń Qarajańǵyl stantsııasynda bolǵan. 

«Qazaqstan temir joly» dereginshe, oqıǵa Moıynty — Shyǵanaq ýchaskesinde bolǵan: 17:15–te baǵyt boıymen kele jatqan júk poıyzy mashınısi joldaǵy temirjolshylardy baıqap, shuǵyl tejeý qoldanǵan. Ol sátte Saryshaǵan stantsııasynyń jol jóndeý brıgadasy relsti aýystyrý boıynsha josparly jumystar júrgizip jatqan.

Alaıda qabyldanǵan barlyq qaýipsizdik sharalaryna qaramastan, apatty boldyrmaý múmkin bolmady. Tórt jumysshy alǵan jaraqattarynan oqıǵa ornynda kóz jumdy

Oqıǵanyń barlyq mán-jaıyn anyqtaý úshin «QTJ» UK» AQ basqarma tóraǵasy arnaıy komıssııa qurýdy tapsyrdy. Onyń quramyna ulttyq kompanııanyń bas ınjeneri, «QTJ-Júk tasymaly» JShS jáne magıstraldyq jeli dırektsııasynyń basshylary endi. Komıssııa oqıǵa ornyna jedel jetip, tekseristi bastady.

Polıtsııa qazirgi ýaqytta bolǵan jaǵdaıdyń mán-jaıyn anyqtaýǵa baǵyttalǵan tergeý áreketteri júrgizilip jatqanyn naqtylady. QІJK-niń 201-babyna sáıkes ózge málimetter jarııa etilmeıdi.

Eske sala keteıik, Moıynty-Shyǵanaq ýchaskesinde tórt temirjolshy qaza tapty.