Qaraǵandy oblysynda tabıǵı monopolııa sýbektilerine 18 mln teńge aıyppul salyndy
QARAǴANDY. KAZINFORM – Qaraǵandy oblysynyń prokýratýrasy Investorlardyń quqyqtaryn qorǵaý komıtetimen birlesip, kásipkerlik qyzmetti júrgizýge jáne ınvestıtsııalyq jobalardy iske asyrýǵa kedergi keltirgen tabıǵı monopolııa sýbektileriniń qyzmetinde eleýli zań buzýshylyqtardy anyqtady.
Investorlar men kásipkerlerge qyzmet kórsetý zańdylyǵyna júrgizilgen taldaý barysynda tabıǵı monopolııalar týraly zańnama talaptarynyń 640-tan astam buzýshylyǵy anyqtaldy.
Eń jıi kezdesetin zań buzýshylyqtar - ınvestorlardyń ótinishterin qaraý merzimderin saqtamaý, ınjenerlik jelilerge qosylýǵa arnalǵan tehnıkalyq sharttardy berýden negizsiz bas tartý, qujattarǵa artyq talaptardy engizý, sondaı-aq bos qýattardyń bar ekendigi týraly aqparatty jasyrý faktileri.
Qadaǵalaý is-sharalarynyń nátıjeleri boıynsha jáne Investorlardyń quqyqtaryn qorǵaý komıtetiniń úılestirýimen prokýratýra organdary qadaǵalaý aktilerin engizdi. Olardy qaraý qorytyndysy boıynsha bes tabıǵı monopolııa sýbektisi ákimshilik jaýapqa tartyldy. Salynǵan aıyppuldardyń jalpy somasy 18 mıllıon teńgeden asty.
Kórsetilgen jaǵdaılardyń birin Qaraǵandy qalasy Álıhan Bókeıhan atyndaǵy aýdanynyń prokýratýrasy anyqtady. Tabıǵı monopolııa sýbektisi ınvestordyń óndiristi keńeıtý jáne ınvestıtsııalyq jobany iske asyrý úshin qajetti elektr qýatyn ulǵaıtý boıynsha ótinishin qanaǵattandyrýdan negizsiz bas tartqan.
Prokýratýranyń aralasýy nátıjesinde kásipkerdiń quqyqtary qalpyna keltirildi: zań buzýshylyqtar joıylyp, ınvestorǵa tehnıkalyq sharttar berildi jáne elektr qýatynyń kólemi qajetti deńgeıge deıin ulǵaıtyldy.
Qyzmet kórsetýden zańsyz bas tartqany úshin tabıǵı monopolııa sýbektisi ákimshilik jaýapqa tartylyp, oǵan 605 myń teńge kóleminde aıyppul salyndy.
Sonymen qatar prokýrorlyq qadaǵalaý aktisi boıynsha paıdalanylmaı jatqan elektr qýatynyń kólemi bosatyldy. Bul sheshim jańa tutynýshylardy elektr jelilerine qosýǵa, bıznes úshin ınfraqurylymnyń qoljetimdiligin arttyrýǵa jáne óńirde ınvestıtsııalyq jobalardy iske asyrýǵa qosymsha jaǵdaı jasaýǵa múmkindik beredi.
Investorlardyń quqyqtaryn qorǵaý, ınfraqurylymǵa teń qoljetimdilikti qamtamasyz etý jáne ákimshilik kedergilerdi joıý prokýratýra organdary qyzmetiniń negizgi baǵyttarynyń biri bolyp sanalady.
