Qaraǵandy oblysynda sý qubyry jelilerin salýǵa 5 mlrd teńgeden astam qarajat bólindi

ASTANA. KAZINFORM – Memleket basshysynyń ınfraqurylymdy damytý jáne halyqty sapaly aýyz sýmen qamtamasyz etý jónindegi tapsyrmasyn oryndaý sheńberinde Úkimet Arnaýly memlekettik qordan Qaraǵandy oblysynda sý qubyry jelilerin salýǵa jáne rekonstrýktsııalaýǵa 5 mlrd teńgeden astam qarajat bóldi. 

Qarjylandyrý qaıtarylǵan aktıvter qarajaty esebinen júzege asyrylady.

Jobalar oblystyń birneshe eldi mekenderinde – Qaraǵandy qalasynda, Tıhonovka, Sadovoe, Kolhoznoe, Aqterek, Álıhan aýyldarynda, sondaı-aq Kóktenkól stansasynda iske asyrylýda.

Sý qubyry jelilerin salý jáne rekonstrýktsııalaý jumystary olardyń tozý deńgeıiniń joǵary bolýyna baılanysty qolǵa alynǵan. Kóptegen jeliler ondaǵan jyldar boıy kúrdeli jóndeýsiz paıdalanylyp, apattar men sý berý úzilisterine, turǵyndardyń shaǵymyna sebep bolyp kelgen. Barlyq jumystardy osy jyldyń sońyna deıin aıaqtaý josparlanyp otyr.

Búginde Qazaqstanda eldi mekenderdi kezeń-kezeńimen aýyz sýmen qamtamasyz etý jospary júzege asyrylyp jatyr. Ónerkásip jáne qurylys mınıstrliginiń dereginshe, Qaraǵandy qalasy turǵyndary aýyz sýmen 99,4%, al aýyldar halqy 97,9% qamtylǵan.

Aıta ketelik Aqtaý qalasynyń jylý jelilerin rekonstrýktsııalaýǵa Úkimet rezervinen 3,6 mlrd teńge bólingen edi.