Qaraǵandy oblysynda shahtada tótenshe jaǵdaı bolyp, 70 adam evakýatsııalandy
QARAǴANDY. KAZINFORM - Lenın shahtasynyń D6 ortalyq konveıer kólbeýinde kómirqyshqyl gazy deńgeıiniń joǵarylaýy tirkeldi. Ázirge zardap shekkender joq.
Qarmet baspasóz qyzmeti shahtada jeldetý júıelerin synaý kezinde bolǵan shtattan tys jaǵdaı týraly habarlady. Kómir departamentine qarasty Lenın atyndaǵy shahtada búgin kómirshqyshqyl gazynyń joǵarylaǵany týraly aqparat tústi.
«Avtomatty datchıktermen jeldetý júıelerin tekserý boıynsha josparly jumystardy júrgizý kezinde 54-shi pıket aýdanyndaǵy D6 170 m gorızont ortalyq konveıerlik eńiste kómirqyshqyl gazynyń deńgeıiniń joǵarylaýy tirkeldi. Osynyń saldarynan jóndeý jumystaryna tartylǵan kenshiler brıgadasyn evakýatsııalaý jospary dereý engizildi. Qabyldanǵan shuǵyl sharalar nátıjesinde 70 shahta qyzmetkeri qaýipsiz jerge shyǵaryldy. Kenshiler arasynda zardap shekkender joq», - dep habarlady Qarmet-tiń baspasóz qyzmeti.
Oqıǵa ornynda Qarmet basshylyǵy, Kásibı áskerılendirilgen avarııalyq-qutqarý qyzmeti, TJD mamandary jumys júrgizip jatyr.
«Shtattan tys jaǵdaıdyń aldyn ala sebebi shahtanyń jeldetý júıesiniń jabdyqtaryn synaý kezinde kómirqyshqyl gazynyń deńgeıiniń joǵarylaýy bolyp otyr. Mundaı jumystar ken ornynda 2017 jyldan beri júrgizilmegen. Atalǵan synaqtar taý-ken jumystary kezindegi qaýipsizdik júıeleri men eńbek jaǵdaılarynyń aýdıti boıynsha aýqymdy jumystardyń bir bóligi bolyp tabylady», - dep qosty kompanııadan.
