Qaraǵandy oblysynda tabıǵı órt órshidi
QARAǴANDY. KAZINFORM — Qaraǵandy oblysynda tabıǵı órtterdi sóndirýge 500-den astam adam men 145 tehnıka jumyldyryldy. Keıingi táýlikte óńirde jalpy aýmaǵy shamamen 90 gektar bolatyn bes órt oshaǵy aýyzdyqtaldy, taǵy segiz oshaq baqylaýda, olardy sóndirý jumystary táýlik boıy jalǵasyp jatyr.
Shet, Buqar jyraý jáne Qarqaraly aýdandarynda taýly-dalaly jerlerde qurǵaq shóp pen butalardyń tutanýynan paıda bolǵan tabıǵı órtterdi sóndirý jumystary jalǵasyp jatyr.
Tilsiz jaýmen kúreske Tótenshe jaǵdaılar mınıstrligi men jergilikti atqarýshy organdardyń 500-den astam qyzmetkeri jáne 145 tehnıkasy tartyldy.
Qarqaraly aýdanynyń Besoba aýylyndaǵy órtti sóndirýge TJM-niń «Qazavıaqutqarý» tikushaǵy jumyldyryldy. Áýe kemesi sý tógetin arnaıy qurylǵymen jabdyqtalǵan. Tikushaqtan jalpy kólemi 12 tonna bolatyn sý tórt ret tógildi.
— Jaǵdaıǵa taýly-dalaly jer bederiniń qoljetimsiz bolýy, aýa raıynyń ystyq ári qurǵaq bolýy jáne ekpindi jel áser etip otyr. Jumyldyrylǵan barlyq kúsh pen quraldyń jumysyn úılestirý maqsatynda Qaraǵandy oblysynyń Tótenshe jaǵdaılar departamentinde jedel shtab quryldy, — dep habarlady vedomstvonyń baspasóz qyzmeti.
TJD málimetinshe, qazirgi ýaqytta eldi mekenderge qaýip tónip turǵan joq. Tabıǵı órtterdi sóndirý jáne olardyń taralýyna jol bermeý jumystary táýlik boıy júrgizilip jatyr.
Buǵan deıin Qaraǵandyda 7 gektar jer órtenip, qalaǵa tútin jaıylǵanyn habarlanǵan bolatyn.
