Qaraǵandy oblysynda sibir jarasynyń anyqtalýy: bir adam aýyr halde jatyr
Qaraǵandy oblysynyń Densaýlyq saqtaý basqarmasy sibir jarasy anyqtalǵan naýqastardyń jaǵdaıy jaıly habarlady. Dárigerlerdiń aıtýynsha, aýrýhanaǵa túskenderdiń biri aýyr jaǵdaıda reanımatsııada jatyr, dep habarlaıdy Kazinform agenttiginiń tilshisi.
Dárigerlerdiń aıtýynsha, qazirgi ýaqytta oblystyq juqpaly aýrýlar aýrýhanasynyń statsıonaryna sibir jarasy dıagnozymen 4 naýqas jatqyzylǵan. Patsıentterdiń úsheýinde dıagnoz PTR molekýlalyq-genetıkalyq ádisimen tekserilip, rastaldy. Bir patsıent boıynsha nátıje áli kútilýde. Sebebi ol aldyńǵy patsıentterge qaraǵanda áldeqaıda keshirek túsken.
Belgili bolǵandaı, aýrýhanaǵa jatqyzylǵan naýqastardyń barlyǵy bir otbasynyń músheleri.
"Bizdiń aýrýhanada jatqan naýqastardyń biri reanımatsııa bóliminde emdelip jatyr. Naýqastyń jaǵdaıy óte aýyr, oǵan sibir jarasy dıagnozy qoıylǵan, jaǵdaı rastalǵan. Jalpy, septıkalyq aǵymy aýyr ótýde. Búgingi tańda naýqastyń jaǵdaıy endogendik ıntoksıkatsııa sındromyna, jiti búırek jetkiliksizdigine, gemorragııalyq sındromǵa jáne teri-qabyný sındromyna baılanysty aýyr kúıinde saqtalyp otyr. Naýqasqa barlyq qajetti terapııatolyq em-dom kórsetilip jatyr. Bul naýqas boıynsha oblystyq konsılıým ótkizildi. Sonymen qatar, biz respýblıkadan, osy patsıentti basqarý jónindegi ǵylymı-zertteý ortalyqtarynan kelgen áriptesterimizdiń qatysýymen respýblıkalyq konsılıým ótkizdik. Bizdiń emdeý taktıkamyzben áriptesterimiz kelisip, usynystar berdi, túzetý júrgizdi", - dedi Oblystyq klınıkalyq aýrýhananyń ınfektsııalyq ortalyǵynyń jetekshisi, Qaraǵandy medıtsına ýnıversıtetiniń ınfektsııalyq aýrýlar kafedrasynyń qaýymdastyrylǵan professory Erjan Júnisov.
Qalǵan 3 naýqas ınfektsııa bóliminde em alyp jatyr. Olardyń ekeýinde dıagnoz rastalǵan. Patsıentter turaqty, endogendik ıntoksıkatsııa sındromdaryna jáne teri-qabyný sındromyna baılanysty olardyń jaǵdaıy ortasha aýyr kúıinde qalyp otyr. Dárigerler oblystyq konsılıým jáne terapııany túzetý jumystaryn júrgizdi. Qazirgi ýaqytta patsıentter barlyq qajetti terapııany alýda.
Eske salsaq, Qaraǵandy oblysynyń Topar kentinde karantın jarııalandy. Eldi mekende sibir jarasy anyqtaldy.
Keıin kentte úsh adamnan sibir jarasy anyqtaldy.
