Qaraǵandy oblysynda sáýir aıynda qatty jel men shańdy daýyl kútiledi
QAZAQPARAT. KAZINFORM – Óńirde sáýir aıyndaǵy aýa raıy qubylmaly sıpatta bolady: jylyný kezeńderi salqyndaýmen almasyp, jaýyn-shashynmen qatar qatty jel men shańdy daýyl bolýy yqtımal.
Qaraǵandy oblysynda 2026 jylǵy sáýir aıy klımattyq normadan jylyraq bolady dep boljanýda. «Qazgıdromet» RMK Qaraǵandy oblystyq fılıalynyń málimetinshe, osy aıda ortasha aýa temperatýrasy +6,1-den +11,8 gradýsqa deıin jetip, bul qalypty kórsetkishterden shamamen bir gradýsqa joǵary bolady.
Aıdyń basy turaqsyz bolmaq: túngi ýaqytta aýa temperatýrasy keıde nólden tómendep, kúndiz +11…+16 gradýsqa deıin jylynady. Alaıda osydan keıin qysqa merzimdi salqyndaý kezeńi bolýy múmkin. Ekinshi onkúndikte sınoptıkter birtindep kún jylynady dep boljaıdy – sáýirdiń ortasyna qaraı kúndizgi temperatýra +16…+21 gradýsqa deıin kóteriledi, al kezeń sońynda aýa temperatýrasy +26 gradýsqa deıin jetýi yqtımal.
Úshinshi onkúndik aıdyń eń jyly kezeńi bolady dep kútilýde: túnde aýa temperatýrasy 0-den +15 gradýs aralyǵynda saqtalyp, kúndiz jekelegen aýmaqtarda +28…+33 gradýsqa deıin ysýy múmkin.
Jaýyn-shashyn mólsheri aı boıy norma sheginde boljanyp otyr – 8-den 30 mm-ge deıin. Sáýirdiń alǵashqy jartysynda jańbyr men dymqyl qar jaýýy yqtımal bolsa, keıingi kezeńde jaýyn-shashyn negizinen jańbyr túrinde túsedi. Sınoptıkter shańdy daýyldardyń bolý qaýpin de joqqa shyǵarmaıdy – mundaı qubylystar aıdyń basynda, ortasynda jáne sońyna qaraı baıqalýy múmkin.
Jel rejımine erekshe mán berilýde: sáýir aıynda jeldiń ekpini 15–20 m/s-qa deıin kúsheıýi yqtımal, ásirese aıdyń ortasy men sońynda. Sonymen qatar sáýirdiń orta tusynda naızaǵaıly qubylystar da oryn alýy múmkin.
Kópjyldyq meteorologııalyq baqylaýlarǵa sáıkes, táýliktik ortasha temperatýranyń 0 gradýstan joǵary turaqty ótýi ádette 8–12 sáýir aralyǵynda tirkeledi, al qar jamylǵysy osy kezeńnen keıin birneshe kún ishinde tolyqtaı erıdi.
Mamandar uzaq merzimdi aýa raıy boljamy keńes berý sıpatynda bolatynyn jáne naqty meteorologııalyq jaǵdaılarǵa baılanysty naqtylanýy múmkin ekenin eskertedi.
Osyǵan deıin sınoptıkter Qyzylorda oblysynyń sáýir men mamyrdaǵy, sondaı-aq jazdaǵy aýa raıyna arnalǵan boljamdy usynǵany jaıly habarlaǵan bolatynbyz.
