Qaraǵandy oblysynda prokýratýra tekserisinen keıin sý tarıfi eki esege arzandady
ASTANA. KAZINFORM — Qaraǵandy oblysy Shet aýdanynyń prokýratýrasy 1200-den astam tutynýshynyń quqyǵyn qorǵady. Bul týraly óńirlik prokýratýranyń baspasóz qyzmeti málim etti.
Shet aýdanynyń prokýratýrasy kommýnaldyq qyzmetterdi kórsetý jáne tutynýshylardyń quqyqtaryn qorǵaý salasyndaǵy zańnamanyń saqtalýyna taldaý júrgizdi.
Tekserý barysynda memlekettik kommýnaldyq kásiporynnyń «ShetKommýnServıs» qyzmetinde buzýshylyqtardy anyqtaldy.
— Kásiporynnyń sý tutyný úshin tólem merzimderin zańsyz shektegeni jáne azamattardyń jeke derekteriniń memleket kepildik bergen qorǵaý talaptaryn buzǵany anyqtaldy, — delingen habarlamada.
Jeke derekterdiń qorǵalmaýy azamattar úshin, sonyń ishinde alaıaqtardyń teris áreketteri saldarynan, eleýli zardaptarǵa ákelýi múmkin.
Prokýrorlyq qadaǵalaý aktisin qaraý nátıjeleri boıynsha anyqtalǵan buzýshylyqtardy joıý jóninde sharalar qabyldanyp, 1237 tutynýshynyń, onyń ishinde 22 jeke kásipkerdiń quqyqtary qalpyna keltirildi.
205 jeke tulǵanyń derbes derekteri habarlama shottarynan alynyp tastaldy, bul olardyń qupııa aqparatyn qorǵaý deńgeıin arttyrdy.
Sonymen qatar, aýdandyq aýrýhananyń sýmen jabdyqtaý tarıfi eki eseden astamǵa tómendetilip, 705 teńgeden 352 teńgege deıin qysqartyldy.
Qabyldanǵan sharalar zańdylyqty qalpyna keltirýge jáne azamattardyń quqyqtaryn qorǵaýǵa yqpal etti.
Buǵan deıin Qaraǵandyda 58 myń turǵyn jylý aqysyn joǵary tarıfpen tólep kelgeni habarlandy.
