Qaraǵandy oblysynda poıyz qaǵyp ketken eki jastaǵy búldirshin kóz jumdy

QARAǴANDY. KAZINFORM – Qaraǵandy oblysynda temirjolda poıyz qaǵyp ketken eki jasar bala mert boldy. Bul aqparatty oblystyq densaýlyq saqtaý basqarmasy rastady.

Qaıǵyly oqıǵa 1 maýsym kúni Qaraǵanózek pen Qarabas stantsııalary arasyndaǵy temirjol ótkelinde bolǵan. Aldyn ala málimet boıynsha, júk poıyzynyń mashınısi temirjol ústinde júrgen balany baıqap, shuǵyl toqtatýǵa tyrysqanymen, oqıǵanyń aldyn alý múmkin bolmaǵan. Aýyr jaraqat alǵan búldirshin shuǵyl túrde oblystyq balalar aýrýhanasyna jetkizildi.

Dárigerler birneshe kún boıy onyń ómiri úshin kúreskenimen, balanyń jaǵdaıy asa aýyr bolýyna baılanysty aman alyp qalý múmkin bolmady.

— Dárigerler bar kúshin saldy, biraq ókinishke qaraı, balanyń ómirin saqtap qala almadyq, — dep málimdedi oblystyq densaýlyq saqtaý basqarmasy.

Polıtsııa atalǵan derek boıynsha temirjol kóligi qozǵalysynyń qaýipsizdik erejelerin buzý faktisimen qylmystyq is qozǵaǵan. Qazir tergeý amaldary júrgizilip jatyr: tártip saqshylary balanyń temirjol boıyna qalaı shyǵyp ketkenin jáne yqtımal jaýapty tulǵalardy anyqtaýǵa kiristi.

Іs boıynsha tergeý jalǵasyp jatyr. 

Osyǵan deıin elimizde jyl saıyn myńǵa jýyq bala jazataıym oqıǵadan qaıtys bolatyny týraly habarlaǵan bolatynbyz.