Qaraǵandy oblysynda polıtseıler júrgizýshi kýáliginsiz jolaýshy tasymaldaǵandardy ustady

QARAǴANDY. KAZINFORM - Qaraǵandy oblysynda jol qozǵalysy qaýipsizdigin qamtamasyz etý jáne zańsyz jolaýshylar tasymalynyń aldyn alý maqsatynda «Tasymaldaýshy» jedel-profılaktıkalyq is-sharasy jalǵasyp jatyr. 

Reıd barysynda patrýldik polıtsııa qyzmetkerleri Qyzylorda — Jezqazǵan — Qaraǵandy — Shiderti avtojolynda Toyota Estima kóligin toqtatqan. Polisia.kz portalynyń málimetine súıensek, tekserý kezinde júrgizýshiniń júrgizýshi kýáliginen aıyrylǵanyna qaramastan, qalaaralyq baǵytta jolaýshylar tasymaldap júrgeni anyqtalǵan. 

Uqsas derek Astana — Qaraǵandy — Almaty tasjolynda da tirkeldi. Polıtseıler júrgizýshi kýáliginen aıyrylǵan Toyota Alphard avtokóliginiń júrgizýshisin ustady.

Sonymen qatar oblys joldarynyń birinde Mercedes Sprinter kóliginiń júrgizýshisi otyrǵysh oryndaryn uıyqtaıtyn oryndarǵa qaıta jabdyqtaǵany úshin jaýapkershilikke tartyldy.

Kólikter aıyp turaǵyna qoıyldy. Polıtsııa azamattardyń qaýipsizdigin qamtamasyz etý maqsatynda zańsyz jolaýshylar tasymalymen kúresti júıeli túrde jalǵastyryp jatyr.

Tártip saqshylary júrgizýshilerdi jol qozǵalysy erejelerin jáne jolaýshylardy tasymaldaýdyń belgilengen talaptaryn qatań saqtaýǵa shaqyrady.

Eske sala keteıik, buǵan deıin Pavlodar oblysynda er adamdy qaǵyp, oqıǵa ornynan ketip qalǵan júrgizýshiler polıtsııaǵa jetkizilgenin jazǵanbyz.