Qaraǵandy oblysynda polıtseıler zańdy talapqa baǵynbaǵan júrgizýshini qýdy
Qaraǵandy oblysynyń polıtseıleri zańdy talapqa baǵynbaǵan júrgizýshini 100 shaqyrym jerge deıin qýdy. Kazinform bul týraly Polisia.kz-ke silteme jasap habarlaıdy.
Aýa raıynyń kúrt ózgerýine baılanysty jol-kólik oqıǵalaryna jol bermeý maqsatynda Qaraǵandy oblysynyń aýmaǵynan ótetin respýblıkalyq mańyzy bar Almaty – Ekaterınbýrg tas jolynyń Qaraǵandy – Balqash baǵyty jabylǵany belgili. Osyǵan oraı Shet aýdany, Aqsý-Aıýly kentinde kólik aǵynyn toqtatý maqsatynda aýdandyq polıtsııa bóliminiń jergilikti polıtsııa qyzmeti, oblystyq polıtsııa departamenti patrýldik polıtsııa batalony men ákimshilik polıtsııa basqarmasy qyzmetkerlerinen blok-beket qoıyldy.
Balqashtan Qaraǵandyǵa qaraı baǵyt alyp kele jatqan Toyota Highlander avtokóliginiń 27 jastaǵy júrgizýshisi polıtsııa qyzmetkerleriniń zańdy talaptaryna baǵynbaı, joldyń qarsy baǵytyna shyǵyp, Qaraǵandyǵa qaraı bet alǵan. Osy kezde, patrýldik polıtsııa batalonynyń vzvod komandıri A.Naqypbekov jáne Shet aýdandyq polıtsııa bóliminiń aǵa ınspektory D.Ákimov atalǵan kólikti qyzmettik avtokólikpen toqtatpaq bolǵan. Alaıda jol talǵamaıtyn kóliktiń júrgizýshisi tártip saqshylarynyń aldyǵa shyǵyp toqtatýyna kedergi jasap, jol bermegen. Sondyqtanda tártip saqshylary qosymsha polıtsııa jasaǵyn shaqyryp, 100 shaqyrym jol júrip, Abaı aýdanyna qarasty Jumabek eldi mekeninde biraq toqtaǵan. Tártip sakqshylary kólikti toqtatqanymen júrgizýshi kólik ishinen shyqpaı, polıtseılerdi biraz áýre-sarsańǵa saldy. Keıin kólikti májbúrli túrde ashý týraly eskertpeden keıin, ol esigin ashqan. Kólikten shyqqannan keıin júrgizýshi polıtseılerge qarsylyq tanytyp, oǵan qatysty qoıan-qoltyq urysynyń ádisteri qoldanyldy.
Quqyq buzýshy Shet aýdandyq polıtsııa bólimine jetkizildi. Oǵan qatysty Ákimshilik quqyq buzýshylyq kodeksiniń úsh baby, ıaǵnı joldyń qarsy baǵytyna shyǵý, jol-kólik oqıǵasyn jasaýǵa jaǵdaı týdyrý, ishki ister organy qyzmetkerleriniń zańdy talaptaryna baǵynbaý boıynsha hattama toltyryldy. Jınaqtalǵan materıaldar sotqa joldandy. Máselen, júrgizýshige qatysty Qazaqstan Respýblıkasy Ákimshilik quqyq buzýshylyq kodeksiniń 606-baby 1-tarmaǵyna qatysty toltyrylǵan hattama boıynsha júrgizýshige 10 aılyq eseptik kórsetkish mólsherinde aıyppul toltyryldy.
Eger sot júrgizýshini kináli dep tanysa, oǵan Ákimshilik quqyq buzýshylyq kodekstiń 613-baby 1-tarmaǵyna qatysty 40 aılyq eseptik kórsetkish mólsherinde aıyppul ne bolmasa 3 táýlikke deıin qamaýǵa alý, 667-baby 1-tarmaǵyna sáıkes 30 aılyq eseptik kórsetkish mólsherinde aıyppul nemese 15 táýlikke deıin qamaýǵa alý, sonymen qatar 596-baby 3-tarmaǵyna sáıkes 6 aıǵa júrgizýshi kýáliginen aıyrý jazasy kózdelgen.
