Qaraǵandy oblysynda paıdalanylmaı jatqan 46 271 gektar jer memleketke qaıtaryldy
QARAǴANDY. KAZINFORM - Qaraǵandy oblysy Nura aýdanynyń prokýratýrasy júrgizgen tekserý barysynda 46 271 gektar paıdalanylmaı jatqan aýyl sharýashylyǵy ýchaskesin anyqtady.
Qaraǵandy oblystyq prokýratýrasy baspasóz qyzmetiniń habarlaýynsha, jerdiń kadastrlyq quny 258 mıllıon teńgeden astam somany qurady. Jer ýchaskesi uzaq ýaqyt boıy óz maqsaty boıynsha paıdalanylmaı kelgen.
Qabyldanǵan sharalardyń nátıjesinde atalǵan jer ýchaskesi memleket menshigine qaıtaryldy. Endi bul jer ony aýyl sharýashylyǵyn damytýǵa tıimdi paıdalana alatyn jaýapty azamattarǵa beriledi.
- Mundaı ýchaskeler óńirge jáne turǵyndarǵa paıdasyn tıgizýi úshin paıdalanylmaı jatqan jerlerdi anyqtaý jáne qaıtarý jumystary jalǵasady – delingen habarlamada.
Osyǵan deıin Almaty oblysy 90 myń gektar jerdi memleket menshigine qaıtarǵaly otyrǵanyn jazdyq.