Qaraǵandy oblysynda Naýryz keń kólemde atalyp ótip jatyr
QARAǴANDY. KAZINFORM — Kóktemniń shýaǵyna bólengen Qaraǵandy óńiri Naýryz meıramyn aıryqsha sán-saltanatpen, keń tynyspen jáne shynaıy yqylaspen qarsy alyp jatyr.
Halyqtyq jáne zamanaýı áýender úndesip, shat-shadyman kóńil kúı men aqjarqyn júzder merekeniń erekshe rýhyn aıshyqtaı túsýde. Óńirdiń barlyq qala-aýdandarynda uıymdastyrylǵan dýmandy sharalar dástúr men jańashyldyqty sabaqtastyryp, árbir turǵyn men qonaqty jańarý men úılesim merekesiniń ajyramas bóligine aınaldyrdy.
Qalalardyń ortalyq alańdarynda etnoaýyldar boı kóterip, taqyryptyq kıiz úıler tigilip, teatrlandyrylǵan qoıylymdar, aıtys pen kontserttik baǵdarlamalar usynylýda.
Merekeniń eń aýqymdy alańdarynyń biri Qaraǵandy qalasynyń Ortalyq mádenıet jáne demalys saıabaǵynda uıymdastyryldy.
Mundaǵy merekelik atmosfera kireberisten-aq aıqyn ańǵarylady: ulttyq naqyshtaǵy sándi arka, týlarmen kómkerilgen keńistik — barlyǵy úılesimdi bezendirilgen.
Merekeniń shymyldyǵy «Qosh keldiń, Áz-Naýryz» atty teatrlandyrylǵan qoıylymmen túrildi.
— Naýryz — jaı ǵana mereke emes, bul — rýhanı jańǵyrý men ishki túleýdiń kezeńi. Ol bizge adamgershilik pen izgilikke negizdelgen qarapaıym, biraq ómirlik mańyzdy qundylyqtardy eske salady: úılesimde ómir súrý, bir-birimizdi qurmetteý. Eń bastysy — ýaqytynda aıaldap, ómirge jańasha kózqaraspen qaraý, — dedi Qaraǵandy oblysynyń ákimi Ermaǵanbet Bólekpaev.
Merekelik sharalar kontserttik baǵdarlamamen jalǵasyn tapty.
Sahnada shyǵarmashylyq ujymdarmen birge belgili óner maıtalmandary — Nurlan Ónerbaev, Marjan Arapbaeva jáne «Jigitter» toby óner kórsetti.
Kórermenderge halyq ánderi men zamanaýı estradalyq shyǵarmalar usynyldy.
Jaǵalaýda ornalasqan merekelik shatyr bıylǵy dýmannyń basty ortalyqtarynyń birine aınaldy.
Munda sándik-qoldanbaly óner týyndylarynyń kórmesi, oblystyq tarıhı-ólketaný murajaıynyń kóshpeli ekspozıtsııasy uıymdastyryldy. Sonymen qatar zamanaýı tehnologııalarǵa arnalǵan alańda robototehnıka men jasandy ıntellekt jobalary tanystyryldy.
Robototehnıka kórmesinde halyqaralyq deńgeıdegi jarystarǵa qatysyp júrgen jas daryndar óz jetistikterin pash etti. Olardyń qatarynda halyqaralyq chempıonattardyń birneshe dúrkin júldegeri — «Murager» mektebiniń komandasy bar.
— Qazirgi jastardyń basym bóligi baǵdarlamalaý men tsıfrlyq tehnologııalarǵa bet burýda. Menińshe, elimizdiń bolashaǵy dál osy baǵyttarmen tyǵyz baılanysty. Bul salalarǵa ınvestıtsııa artqan saıyn, keleshegimiz de nurly bolmaq, — dedi komanda múshesi Damır Maǵjan.
Merekelik alańda balalar oıyn aımaqtary men sporttyq keńistikter de jumys istedi. Munda qazaq kúresi, asyq atý, sadaq atý, arqan tartý jáne ózge de ulttyq sport túrlerinen jarystar ótti.
Naýryz meıramy kóptegen qonaqtyń basyn qosyp, olar bul shýaqty kúndi jaqyndarymen birge qarsy aldy.
Astana qalasynan kelgen Elaman Qoıshybaev ta óz áserimen bólisti.
— Búgin — erekshe kún. Barsha Qazaqstan halqyna beıbit aspan, baqyt pen bereke tileımin. Merekeniń joǵary deńgeıde uıymdastyrylǵany qýantady — bári kórkem ári shynaıy, — dedi ol.
Qala turǵyndary da Naýryzdy zor qýanyshpen qarsy alyp, júrekjardy tilekterin jetkizýde.
Nıkolaı Shpılchenko jubaıy ıÝlııamen jáne kishkentaı qyzymen birge kelgen.
— Barshańyzdy Naýryzben quttyqtaımyz! Ár shańyraqqa densaýlyq, baqyt, beıbitshilik pen bereke tileımiz. Úılerińizde árdaıym jylylyq pen qýanysh ornasyn! — dedi jas otbasy.
— Men úshin Naýryz — jyl saıyn asyǵa kútetin mereke. Saıabaqtaǵy dýman jyl ótken saıyn mazmundy ári qyzyqty bola túsýde. Qaraǵandylyqtar men qala qonaqtaryn osy jarqyn merekemen quttyqtaımyn! — deıdi «Súıinshi» bı ansambliniń qatysýshysy Aıza Muhanova.
Halyqtyq serýender eki kún boıy jalǵasady.
Bıyl Qaraǵandy oblysynda Naýryznama onkúndigi aıasynda ulttyq dástúr men mádenıetti saqtaý jáne keńinen nasıhattaýǵa baǵyttalǵan myńnan astam is-shara uıymdastyryldy.
