Qaraǵandy oblysynda muz ústine shyqqan kólik sýǵa batyp, bir adam qaza tapty

QARAǴANDY. KAZINFORM – Qaraǵandy oblysynda balyq aýlaýǵa shyqqan sapar qaıǵyly jaǵdaımen aıaqtaldy. Muz ústimen ótpek bolǵan avtokólik sýǵa ketip, 63 jastaǵy áıel kóz jumdy.

Qaıǵyly oqıǵa 10 aqpanda Topar kenti mańyndaǵy Sherýbaınura sý qoımasynda boldy. Kólikte 1957 jyly týǵan er adam men 1962 jyly týǵan jubaıy bolǵan. Aldyn ala málimet boıynsha, júrgizýshi joldy qysqartýdy kózdep, kólikpen muz ústine shyqqan. Alaıda muz jamylǵysy salmaqty kótermeı, muz opyrylyp, sanaýly mınýttardyń ishinde sý astyna batyp ketken.

Er adam kólikten ózdiginen shyǵyp úlgergen. Ol medıtsınalyq kómekten bas tartty. Іzdestirý-qutqarý jumystary bir táýlikten astam ýaqytqa sozyldy.

11 aqpan kúni tańerteń Qaraǵandy oblysy Tótenshe jaǵdaılar departamentiniń súńgýirleri áıeldiń denesin avtokólik batqan jerden shamamen tórt metr qashyqtyqtan tapty. Atalǵan aýmaqtaǵy sý tereńdigi shamamen jeti metr bolǵan.

Marqumnyń jubaıy oqıǵanyń qalaı bolǵanyn aıtyp berdi.

— Biz balyq aýlaýǵa bara jatqanbyz. Muz syrttaı berik kórindi. Sondyqtan kólikpen ústine shyqtym. Bir mezette kólik bata bastady. Men syrtqa shyǵyp úlgerdim, al jubaıym shyǵa almady. Ony tek ekinshi kúni tapty, - deıdi ol.

Qazirgi ýaqytta quqyq qorǵaý organdary oqıǵanyń barlyq mán-jaıyn anyqtap jatyr.

Óńirlik TJD mamandary muz ústine avtokólikpen shyǵýǵa qatań tyıym salynatynyn taǵy da eske saldy. Qutqarýshylardyń aıtýynsha, sý aıdyndarynyń qatqan beti kólik qozǵalysyna arnalmaǵan ári qaýipsizdikke kepildik bermeıdi. Mamandar turǵyndardy qarapaıym qaýipsizdik talaptaryn saqtaýǵa jáne ómirine qaýip tóndirmeýge shaqyrady.

Buǵan deıin Qaraǵandy oblysynyń joldarynda 1600-den astam kólik keptelip qalǵanyn jazǵan edik.