Qaraǵandy oblysynda memlekettik organdardyń boryshy 5 jylda 2,2 esege ósip ketken

ASTANA. KAZINFORM – QR Joǵary aýdıtorlyq palatasynyń tapsyrmasymen Qaraǵandy oblysy boıynsha tekserý komıssııasy jergilikti atqarýshy organdardyń (JAO) jáne kvazımemlekettik sektordyń jekelegen sýbektileriniń boryshyn basqarý tıimdiligine aýdıt júrgizdi.

Tekserý is-sharalary Qaraǵandy oblysynyń Qarjy basqarmasyn, Ekonomıka basqarmasyn, Energetıka jáne TKSh basqarmasyn, «Qaraǵandy Sý» JShS, «Teplotranzıt Qaraǵandy» JShS, «Turǵyn úı qoryn jańǵyrtý ortalyǵy» JShS, «Shahter» fýtbol klýby» AQ jáne Qaraǵandy qalasynyń TKSh, jolaýshylar kóligi jáne avtojoldar bólimin qamtydy.

- Nátıjesinde sońǵy 5 jylda jergilikti atqarýshy organdardyń boryshy 2,2 esege, al ony ustaýǵa jumsalatyn shyǵystar 1,5 esege ulǵaıǵany anyqtaldy. Atap aıtqanda, koronavırýs pandemııasy kezinde memlekettik baǵaly qaǵazdardyń aýqymdy shyǵarylymy jáne JAO-nyń 2020 jylǵa arnalǵan borysh lımıtiniń 3,8 mlrd teńgege saqtalmaýy oryn alǵan. Bul rette jalpy boryshtyq júkteme basqarylatyn júkteme retinde baǵalanyp otyr, - dep jazdy Joǵary aýdıtorlyq palatasynan.

Alaıda qazirgi ýaqytta boryshtyń qolaıly dınamıkasyna qaramastan, ony óteý boıynsha bıýdjetke túsetin júktemeniń shyńy 2031 jylǵa túsip otyr – 20 shart boıynsha 21,7 mlrd teńgeni quraıdy. Jalpy, 2024 jylǵy 1 qańtardaǵy negizgi boryshtyń jalpy somasynyń 60,4%-y 2030-2043 jyldar kezeńinde ótelýge jatady.

Sonymen qatar aýdıtorlar oblystyq deńgeıdegi memlekettik organdardyń kvazımemlekettik sektor obektileriniń syrtqy jáne ishki qaryzdaryn baqylaýda formaldy tásil qoldanatynyn da atap ótti.

- Máselen, «Teplotranzıt Qaraǵandy» JShS jumysynyń jalpy tıimsizdigi aıasynda onyń shyǵyndaryn ulǵaıtý kredıttik sharttar boıynsha qabyldanǵan mindettemelerdiń oryndalmaý táýekelin arttyrady.

Taza paıdany «Qaraǵandy Sý» JShS qatysýshylary úlesiniń paıdasyna bólý jáne bir mezgilde bos aqshalaı qarajatty bank depozıtterine sala otyryp bıýdjettik kredıtter alý faktileri anyqtaldy.

«Shahter» FK» AQ-nyń qarjy resýrstaryn tıimsiz basqarý jyldan jylǵa kredıtorlyq bereshektiń, onyń ishinde jalaqy, salyqtar jáne basqa da mindetti tólemder boıynsha bereshektiń ósýine ákep soqty, - delingen aqparatta.

Jalpy júrgizilgen aýdıt qorytyndysy boıynsha QR zańnamasynyń normalaryn buzýdyń jalpy somasy shamamen 5,3 mlrd teńgeni qurady.

Tekserý komıssııasy aýdıt obektilerine qajetti usynymdar jiberip, anyqtalǵan buzýshylyqtardy joıý úshin nusqamalar shyǵardy.

Aıta keteıik, Aqtóbe qalalyq bilim bóliminiń basshysy aýdıtke jalǵan aqparat bergeni úshin jazalandy.