Qaraǵandy oblysynda medbıke múgedek balaǵa merzimi ótken dári bergeni úshin jaýapqa tartyldy

QARAǴANDY. KAZINFORM — Qaraǵandy oblysynyń Buqar jyraý aýdanyna qarasty Petrovka aýylynda ambýlatorııalyq medbıke múgedektigi bar balaǵa jaramdylyq merzimi ótken qurysýǵa qarsy dári bergeni úshin ákimshilik jaýapkershilikke tartyldy.

Bul derek jaıly Alııa Moskalenkonyń mıynda organıkalyq zaqymdanýy men epılepsııa derti bar ulynyń jaǵdaıy kúrt nasharlaǵannan keıin belgili boldy. Anasy balasyna berilgen dári-dármekke kúmándanyp, tıisti organdarǵa shaǵym túsirgen.

Buǵan deıin birneshe aı boıy oń nátıje kórsetip, ustamasyz júrgen bala kenetten aýyr epılepsııalyq ustamaǵa ushyrap, esinen tanyp qalǵan. Osy jaǵdaıdan keıin ǵana anasy ambýlatorııadan berilgen dáriniń merzimi ótip ketkenin anyqtaıdy.

— Bul jaǵdaı adam ómirine qaýip tóndiredi. Mundaı jaýapsyzdyqty aqtaýǵa bolmaıdy. Bul — jaı ǵana salǵyrttyq nemese adamı qatelik emes, bul óreskel zań buzý. Munyń zańdy jaýaby bolýy tıis. Men bul isti jaı qaldyrmaımyn. Eshkimniń meniń balamnyń densaýlyǵyna nuqsan keltirýge quqyǵy joq, — dedi Álııa Moskalenko.

Aýdandyq aýrýhananyń derekterine súıensek, medbıke dárini bergen kezde onyń jaramdylyq merzimin teksermegen. Balanyń anasy medıtsınalyq jáne farmatsevtıkalyq baqylaý departamentine júgingennen keıin tekserý júrgizilip, tártip buzý anyqtaldy.

Departament bóliminiń basshysy Darıa Rostovskaıanyń aıtýynsha, preparatqa retsept 2024 jylǵy 31 jeltoqsanda jazylǵan, biraq dári dertke shaldyqqan balanyń anasyna tek 2025 jylǵy 22 mamyrda ǵana berilgen. Osy ýaqyt aralyǵynda ol birneshe ret dári surap kelgen, alaıda preparat ýaqytynda qolyna tımegen.

— Petrovka aýyldyq dárigerlik ambýlatorııasynyń medbıkesi Ákimshilik quqyq buzýshylyq týraly kodeksiniń 426-baby, 1-bóligi boıynsha jaýapkershilikke tartylyp, aıyppul salyndy, — dep málimdedi Darıa Rostovskaıa.

Alaıda balanyń anasy qabyldanǵan shara jetkiliksiz dep sanaıdy. Eger dári-dármektiń saldarynan balasynyń densaýlyǵyna naqty zııan kelgeni dáleldense, ol sotqa júginýge nıetti.

— Sonda meniń balamnyń ómiri 300 myń teńgemen ólshenip otyr ma? Qazir ol josparly em qabyldap jatyr. Tolyq medıtsınalyq qorytyndy shyqqan soń, men naqty qadamǵa baramyn, — deıdi Alııa Moskalenko.

Qaraǵandy oblystyq densaýlyq saqtaý basqarmasy medbıkege aıyppul salynǵanyn rastady jáne atalǵan jaǵdaı vedomstvo baqylaýynda ekenin atap ótti.