Qaraǵandy oblysynda máslıhat saılaýyna 600-den astam kandıdat tirkeldi
QARAǴANDY. KAZINFORM — Qaraǵandy oblysynda máslıhat depýtattyǵyna kandıdattardy tirkeý naýqany aıaqtaldy. Óńir boıynsha 196 birmandatty saılaý okrýgi qurylyp, olardyń árqaısysynda depýtattyq orynǵa keminde úsh úmitkerden baq synamaq.
Birmandatty aýmaqtyq saılaý okrýgteri boıynsha barlyǵy 612 kandıdat tirkelgen. Onyń 54-i oblystyq máslıhatqa, 301-i qalalyq, 257-si aýdandyq máslıhattarǵa depýtat bolýǵa nıetti.
Kandıdattardy usyný 2026 jylǵy 14-27 qazan aralyǵynda júrgizildi. Osy kezeńde oblys boıynsha birmandatty okrýgterden 672 adam óz kandıdatýrasyn usynǵan. Atap aıtqanda, oblystyq máslıhat depýtattyǵyna — 58, qalalyq máslıhattarǵa — 341, aýdandyq máslıhattarǵa 273 kandıdat usynyldy.
Saılaý komıssııalarynyń málimetinshe, tirkeý kezeńinde 54 kandıdat óz kandıdatýrasyn qaıtaryp alǵan. Taǵy alty úmitkerge tirkeýden bas tartylyp, eki kandıdattyń tirkeý kúshi joıylǵan.
Osylaısha, bir depýtattyq mandatqa orta eseppen 3,1 kandıdattan keledi. Aıta keterligi, óńirdegi birde-bir saılaý okrýginde kandıdattar sany úshten kem emes.
Birmandatty okrýgtermen qatar oblystyq máslıhat depýtattyǵyna partııalyq tizim boıynsha da kandıdattar usynyldy. Bul joly alty saıası partııa óz tizimderin usynyp, oǵan barlyǵy 81 adamdy engizgen. Atap aıtqanda, «Baıtaq», Respublika, «Ádilet», «Aýyl», «Aq jol» partııalarynyń jáne Qazaqstan Halyq partııasynyń oblystyq fılıaldary saılaý naýqanyna qatysady.
Partııalyq tizimdegi kandıdattar sany boıynsha «Ádilet» partııasy aldyńǵy orynda. Bul partııadan 38 adam usynylsa, «Aýyl» partııasynyń tiziminde 12 kandıdat bar. Respublika men Qazaqstan Halyq partııasy 11 adamnan usynǵan. Al «Aq jol» partııasynyń tizimine bes, «Baıtaq» partııasynyń tizimine tórt kandıdat engizilgen.
Saıası partııalardyń barlyq alty tizimi tirkeýden ótken. Olardyń barlyǵy zańnama talaptaryna saı keledi, áıelder men jastarǵa arnalǵan kvota saqtalǵan. Usyný kezeńinen keıin partııalyq tizimin keri qaıtaryp alǵan saıası kúshter joq. Partııalyq tizim boıynsha bir depýtattyq mandatqa orta eseppen 4,5 úmitkerden keledi.
Kandıdattardy tirkeý týraly málimetter Qazaqstan Respýblıkasynyń «Saılaý týraly» Konstıtýtsııalyq zańyna sáıkes buqaralyq aqparat quraldarynda jarııalanyp, saılaý komıssııalarynyń ınternet-resýrstaryna ornalastyryldy.
Saılaý komıssııalarynyń habarlaýynsha, naýqannyń barlyq kezeńi zańnama talaptary men bekitilgen kúntizbelik josparǵa sáıkes ótkizilip jatyr. Tirkeý kezeńinde saılaý komıssııasyna bir ótinish túsken. Ótinish ıesine zańda belgilengen merzimde jaýap berilgen.
Buǵan deıin 29 qarashada ótetin máslıhat saılaýyn uıymdastyrýǵa jáne ótkizýge 35,8 mlrd teńge qarastyrylatyny týraly OSK múshesi Mıhaıl Bortnık málimdegen bolatyn.
