Qaraǵandy oblysynda mamyr aıynda kún raıy qalaı bolady
QARAǴANDY. KAZINFORM – Sınoptıkterdiń boljamynsha, Qaraǵandy oblysynda mamyr aıy ádettegiden jyly, alaıdy qubylmaly bolady. Aldaǵy aptalarda temperatýra kúrt aýytqyp, naızaǵaı oınap, ekpindi jel soǵyp, keı kúnderi túnde úsik júrýi múmkin.
Sınoptıkterdiń boljamyna sáıkes, mamyr aıyndaǵy ortasha aýa temperatýrasy +13,9 ben +18,5 gradýs aralyǵynda bolady. Bul kópjyldyq klımattyq normadan 1–1,5 gradýsqa joǵary. Ádette osy kezeńde oblys boıynsha ortasha temperatýra +12,2-den +17,4 gradýsqa deıin jetedi.
Aıdyń alǵashqy onkúndiginde óńirde kún birtindep jylyna bastaıdy. Túngi ýaqytta aýa temperatýrasy 0…+5 gradýstan +12…+17 gradýsqa deıin kóteriledi. Degenmen onkúndiktiń basynda oblystyń soltústik aýdandarynda -5 gradýsqa deıin úsik saqtalýy múmkin. Al ońtústik bólikte túngi temperatýra +10 gradýsqa deıin jetedi.
Kúndiz aýa +14…+19 gradýstan +26…+31 gradýsqa deıin ysıdy. Alaıda alǵashqy onkúndiktiń sońyna qaraı óńirde kún salqyndaýy yqtımal.
Mamyrdyń ekinshi onkúndiginde oblysqa taǵy da ystyq aýa tolqyny keledi. Túngi temperatýra +5…+10 gradýstan +16…+21 gradýsqa deıin joǵarylaıdy. Al kúndiz aýa temperatýrasy +19…+24 gradýstan +32…+37 gradýsqa deıin jetedi. Eń ystyq kúnder oblystyń soltústik aýdandarynda boljanyp otyr.
Odan keıin óńirde aýa temperatýrasy qaıta kúrt tómendeıdi. Túnde aýa +2…+7 gradýsqa deıin salqyndap, keı jerlerde topyraq betinde -2 gradýsqa deıin úsik júrýi yqtımal. Bul kezeńde kúndizgi temperatýra +16…+21 gradýs shamasynda bolady.
Úshinshi onkúndikte de aýa raıy qubylyp turady. Túngi temperatýra +11…+16 gradýstan +1…+6 gradýsqa deıin tómendeıdi. Keı aýdandarda topyraq betinde -2 gradýsqa deıin úsik bolýy múmkin. Al kúndiz aýa temperatýrasy +25…+30 gradýstan +13…+18 gradýsqa deıin tómendeıdi. Oblystyń ońtústiginde túnde +7 gradýsqa deıin, kúndiz +22 gradýsqa deıin jyly bolady.
Aı sońyna qaraı óńirde kún qaıta jylynady dep kútilýde. Túngi temperatýra +7…+12 gradýsqa deıin kóteriledi, al oblystyń ońtústiginde +18 gradýsqa deıin jetedi. Kúndiz aýa +25…+30 gradýsqa deıin ysıdy.
Mamyr aıynda Qaraǵandy oblysynyń basym bóliginde jaýyn-shashyn mólsheri qalypty deńgeıden tómen bolady dep boljanyp otyr. Tek óńirdiń shetki soltústik-shyǵys bóliginde jaýyn-shashyn kólemi kópjyldyq ortasha kórsetkishke jýyq bolady. Klımattyq derekterge sáıkes, mamyr aıyndaǵy jaýyn-shashyn normasy 9 ben 37 mıllımetr aralyǵyn quraıdy.
Jańbyr men naızaǵaı birinshi jáne ekinshi onkúndikterdiń sońynda, sondaı-aq úshinshi onkúndiktiń ortasynda kútiledi. Sonymen qatar sınoptıkter shańdy daýyl bolýy múmkin ekenin de eskertti. Mundaı qubylys birinshi onkúndiktiń basynda, ekinshi onkúndiktiń ortasynda jáne úshinshi onkúndiktiń sońynda baıqalýy yqtımal.
Sekýndyna 15–20 metrge deıin jetetin ekpindi jel birinshi onkúndiktiń ortasy men sońynda, ekinshi onkúndiktiń sońynda, sondaı-aq úshinshi onkúndiktiń basy men sońynda soǵýy múmkin.
Osyǵan deıin Qazaqstan qalalaryndaǵy aýanyń sapasy týraly jazdyq.
