Qaraǵandy oblysynda lımfangıt dertinen jylqylar qyrylyp jatyr

QARAǴANDY. KAZINFORM – Qaraǵandy oblysy Buqar jyraý aýdanynyń úsh aýylynda epızootııalyq lımfangıt tirkelgen. Eki jyl ishinde 300-den astam jylqy qyrylǵan.

Qaraǵandy oblysy aýmaqtyq ınspektsııasynyń mamandary Buqar jyraý aýdanynyń úsh aýylynda epıdemııa tirkelgenin resmı rastady. Jylqylar arasyndaǵy dertti eki jyl buryn Úmitker aýyldyq okrýginiń mamandary anyqtaǵan. Juqpaly mal aýrýy aýdannyń taǵy eki aýylynda tirkelgen. 

«Karantındik aımaqta Veterınarııalyq baqylaý jáne qadaǵalaý komıteti epızootıkalyq aýrýlarǵa qarsy respýblıkalyq jasaǵynyń mamandary jumys isteýde. Olardyń mindeti — bes kúnde bir ret iri jylqy úıirlerin aınalyp ótip, klınıkalyq rastalǵan aýrýy bar janýarlardy oqshaýlaý. Ár on bes kún saıyn at qoralarda dezınfektsııa jasaý. Biz bul jumystardyń barysyn baqylap otyrmyz», — dep túsindirdi QR AShM Veterınarlyq baqylaý jáne qadaǵalaý komıtetiniń aýmaqtyq ınspektsııasy basqarmasynyń basshysy Darhan Imanbaev. 

Jylqy ıeleri aıtarlyqtaı shyǵynǵa ushyradyq dep shaǵymdanýda. Tórtkól aýylynyń turǵyny Mádenıet Jumadildániń 20 bas maly qyrylyp qalǵan. Sonymen qatar, fermer jylqylaryn emdeýge de qyrýar qarajat jumsaǵanyn aıtady.

«Ótken jyly 10 bas qyryldy. Bıyl taǵy on jylqymnan aıyryldym. Áli de keıbir jylqylarym aýyryp jatyr. Olardy emdeý jáne únemi kútim jasaý kerek. Bul qanshama shyǵyn. Biraq basqa amal joq. Áıtpese, barlyq úıirimizden aıyrylyp qalamyz», — deıdi Mádenıet Jumadilda.

Afrıkalyq juqpaly dert negizinen tuıaqty janýarlar arasynda taraıdy.

Sarapshylardyń pikirinshe, aýrýdy juqtyrǵan jylqylarda jara paıda bolady, sodan keıin olar irińdep ketedi eken. 

Tórtkól aýylynyń turǵyndary, eger jaýapty organdar qyrylǵan maldyń shyǵynyn óteý protsesin jedeldetpese, quzyretti organdarǵa júginbekshi. 

Eske salsaq, jeltoqsan aıynyń sońynda Qaraǵandy oblysynda joǵalyp ketken 47 bas jylqy sýdyń astynan tabylǵan bolatyn.