Qaraǵandy oblysynda kúshti jel saldarynan qulaǵan aǵashtar kólikterdi basyp qalyp jatyr

Qaraǵandy oblysynda kúshti jel saldarynan 70-ten astam aǵash qulap, 10 ǵımarattyń shatyryn ushyryp ketti, dep habarlaıdy Kazinform agenttiginiń tilshisi.

«Qaraǵandy oblysynyń aýmaǵynda jeldiń ekpini 25 m/s deıin kúsheıýi nátıjesinde 8 ákimshilik ǵımarattyń, bir kóppáterli turǵyn úıdiń jáne bir jer úıdiń shatyrynyń bólikteri ushyp ketken. Oblystyń keı jerlerinde jaryq sónip qalǵan. Sondaı-aq, oblys ortalyǵynda aǵashtardyń qulaýy týraly 50 habarlama jáne Temirtaý qalasy boıynsha 20 habarlama kelip tústi. Onyń ishinde 4 jaǵdaıda aǵashtar kólikterge qulaǵan (3 jaǵdaı Qaraǵandy q. 1 jaǵdaı Temirtaý), - dep málimdedi TJD baspasóz qyzmeti.

19 qarashada oblysta qar jaýyp, tuman túsip, kóktaıǵaq bolady degen boljam bar. Osyǵan baılanysty Thtenshe jaǵdaılar departamenti oblystyń barlyq turǵyndarynan jel kúsheıgen kezde qaýipsizdik erejelerin qatań saqtaýyn jáne asa qajet bolmasa kóshege shyqpaýyn jáne eldi mekenderden tys jerlerge jol júrmeýin ótinedi. Sondaı-aq aýa raıynyń ózgerýin, oblys joldaryndaǵy qozǵalys shekteýlerin, TJD resmı saıttaryn jáne buqaralyq aqparat quraldaryn qadaǵalaý kerektigi jaıly eskertý jasady.