Qaraǵandy oblysynda qurylys nysanynda jumysshy qaza tapty

QARAǴANDY. KAZINFORM – Qaraǵandy oblysynda salynyp jatqan zaýytta jumysshy qaza tapty. Bul jaıt boıynsha qylmystyq is qozǵaldy, dep habarlaıdy Kazinform agenttiginiń tilshisi.

Qaıǵyly oqıǵa búgin, 3 qarashada zaýyt aýmaǵynda boldy.

«Salynyp jatqan Qaraghandy power Silicon zaýytynda montajdaý jáne dánekerleý jumystaryn júrgizý kezinde qosalqy merdiger kompanııanyń qyzmetkeri bıiktikten qulap, mert boldy. Eńbek ınspektsııasy departamenti osy oqıǵany tergeý jóninde komıssııa qurady», - dep habarlady eńbek ınspektsııasy departamentiniń baspasóz qyzmeti.

Polıtsııa bul derek boıynsha qylmystyq is qozǵalǵanyn habarlady.

«Salynyp jatqan Qaragandy Power Silicon zaýytynda jazataıym oqıǵa faktisi boıynsha QR QK-niń 156-baby, 3-bóligi «abaısyzda adam ólimine ákep soqqan eńbekti qorǵaý erejelerin buzý» boıynsha sotqa deıingi tergeý bastaldy. Birqatar qajetti saraptama taǵaıyndaldy. Oqıǵanyń mán-jaıy anyqtalyp jatyr», - dep habarlady Qaraǵandy oblysy PD baspasóz qyzmeti.

Eske sala keteıik, buǵan deıin Qaraǵandyda qurylys alańynda bir adam mert bolǵanyn jazǵan edik.