Qaraǵandy oblysynda quny 42,5 mlrd teńge bolatyn farmatsevtıkalyq zaýyt salynady
ASTANA. KAZINFORM – Qazaqstan Úkimeti Qaraǵandy oblysynda óndiristik qýattardy salý jáne jańǵyrtýǵa baǵyttalǵan iri farmatsevtıkalyq jobany maquldady.
Joba Memleket basshysy Qasym-Jomart Toqaev júktegen ımportty almastyrý jáne otandyq dárilik zattar óndirisiniń úlesin arttyrý jónindegi tapsyrmalardy iske asyrý aıasynda júzege asyrylady.
Tıisti ınvestıtsııalyq kelisim Densaýlyq saqtaý mınıstrligi men Qaraǵandy farmatsevtıkalyq kesheni arasynda jasalǵan. Qaýlyǵa Úkimet basshysy Oljas Bektenov qol qoıdy.
Jeke ınvestıtsııalardyń jalpy kólemi 42,5 mlrd teńgeni quraıdy.
Bul joba farmatsevtıkalyq óndiristi lokalızatsııalaýdy tereńdetýge jáne joǵary tehnologııalyq óndiristik qýattardy damytýǵa baǵyttalǵan saladaǵy eń iri ınvestıtsııalyq bastamalardyń birine aınalmaq.
Joba aıasynda dárilik zattardyń 74 ataýyn óndirý josparlanyp otyr.
Óndiristik jeli medıtsınanyń mańyzdy baǵyttaryn qamtıdy. Atap aıtqanda, onkologııalyq, aýtoımmýndy jáne orfandyq aýrýlardy emdeýge arnalǵan ınnovatsııalyq preparattar shyǵarylmaq.
Sonymen qatar zaýytta ımmýnobıologııalyq jáne ózge de joǵary tehnologııalyq dárilik ónimder óndirisi jolǵa qoıylady.
Kásiporynda álemdik standarttarǵa saı belsendi farmatsevtıkalyq ıngredıentter, bıologııalyq jáne bıotehnologııalyq ónimder sıntezi júzege asyrylady.
– Bul joba farmatsevtıka salasyn damytýdyń memlekettik basymdyqtaryna tolyq sáıkes keledi, – delingen habarlamada.
Jobany iske asyrý nátıjesinde Qaraǵandyda 70-ke jýyq jańa jumys orny ashylady.
Úkimet málimetinshe, Qazaqstannyń farmatsevtıka salasy turaqty ósim kórsetip otyr. 2025 jyldyń qorytyndysy boıynsha farmatsevtıka óndirisiniń kólemi 191,1 mlrd teńgege jetip, 2024 jylmen salystyrǵanda 8,7%-ǵa artqan.
Investıtsııa kólemi de aıtarlyqtaı ósken. Bir jyl ishinde bul kórsetkish 91,3 mln dollardan 142,8 mln dollarǵa deıin ulǵaıǵan.
Sonymen qatar 2025 jylǵy jeltoqsannan beri salada jalpy somasy 360 mlrd teńgeni quraıtyn jeti ınvestıtsııalyq kelisim jasaldy. Olar 474 dárilik zat óndirýge jáne 1170-ten astam turaqty jumys ornyn ashýǵa baǵyttalǵan.
Aıta keteıik, Qazaqstan sońǵy jyldary dárilik qaýipsizdikti kúsheıtý jáne otandyq farmatsevtıkalyq óndiristi damytý baǵytyndaǵy jumystardy júıeli túrde júrgizip keledi.
Buǵan deıin Oljas Bektenov jeńil ónerkásipti damytý tásilderin qaıta qaraýdy tapsyrdy.
