Qaraǵandy oblysynda qulaǵan áskerı ushaq jóndeýge jaramdy ma – mınıstrlik jaýaby
ASTANA. KAZINFORM – Apatqa ushyraǵan Sý-30SM joıǵysh ushaǵyn qaıta paıdalaný máselesin arnaıy komıssııa anyqtaıdy. Bul jóninde QR Qorǵanys mınıstrligi resmı saýalymyzǵa joldaǵan jaýabynda málimdedi.
– Ushaqty qalpyna keltirý jáne ony ári qaraı paıdalaný jaramdylyǵy máselesi Qorǵanys mınıstrliginiń arnaıy komıssııasynyń quzyretine jatady. Áýe kemesin jóndeý jáne qaıta paıdalaný múmkindigi týraly túpkilikti sheshim alynǵan zaqymdardyń sıpaty, ekonomıkalyq oryndylyǵy jáne normatıvtik qujattardyń talaptary eskerile otyryp, keshendi tehnıkalyq saraptama nátıjeleri boıynsha qabyldanady, – delingen habarlamada.
Sonymen qatar mınıstrlikten apattyń sebebi jóninde de suraǵan edik.
– Sý-30SM joıǵysh ushaǵynyń apatqa ushyraý sebepterin anyqtaý úshin Qorǵanys mınıstrliginiń arnaıy komıssııasy taǵaıyndaldy. Qazirgi ýaqytta oqıǵanyń barlyq mán-jaıy anyqtalyp jatyr. Komıssııa jumysy aıaqtalyp, tıisti protsestik sheshimder qabyldanǵanǵa deıin apat sebebi týraly qorytyndy jasaý múmkin emes, – delingen resmı jaýapta.
Eske salaıyq, Sý-30SM joıǵysh ushaǵy josparly oqý-jattyǵý ushýlaryn oryndaý kezinde Qaraǵandy qalasynan 26 shaqyrym jerde qulaǵan.
Ekıpaj der kezinde katapýltamen sekirip úlgerip, eki ushqysh ta aman qaldy. Mınıstrlik málimetinshe, olar medıtsınalyq tekserýden ótti. Densaýlyq jaǵdaıy qanaǵattanarlyq, ushqyshtardyń ómirine qaýip joq.
