Qaraǵandy oblysynda quqyq buzýshylyqtardyń aldyn alatyn QR-kod jobasy iske qosyldy
QARAǴANDY. KAZINFORM – Qaraǵandy oblysynda qylmystyq quqyq buzýshylyqtardyń aldyn alýǵa baǵyttalǵan jańa QR-kod tanystyryldy. Jobanyń tusaýkeseri oblys prokýrory Baýyrjan Myrzakerovtyń tóraǵalyǵymen ótti.
QR-kodta ınternet-alaıaqtyq, esirtki qylmystary, «dropperlik» shemalar, jol qaýipsizdigi, daýly jaǵdaılar jáne ınternettegi etıka máselelerine arnalǵan qysqasha ıllıýstratsııalar men broshıýralar jınaqtalǵan. Materıaldarda derekti fılmderge jáne oblys prokýratýrasynyń resmı paraqshalaryna siltemeler de ornalastyrylǵan.
Joba aıasynda QR-kod adamdar kóp shoǵyrlanatyn oryndarǵa, qoǵamdyq kólikke jáne kommýnaldyq tólem túbirtekterine ornalastyrylmaq.
- Bastamany alǵashqylardyń biri bolyp qoldaýǵa daıyn ekenin bildirgen qala kásipornynyń ıesi óz nysanynda aqparattyq materıaldardy ornalastyrýǵa kelisim berdi. Ol oblys prokýrory tarapynan yntalandyryldy, - delingen aqparatta.
Kezdesýde qatysýshylarǵa «Zań men Tártip» ıdeologııasyn iske asyrýdyń negizgi baǵyttary túsindirilip, óńirdegi krımınogendik ahýalǵa qatysty suraqtarǵa jaýap berildi.
Aıta keteıik, Qaraǵandyda kásipkerdi qorqytyp, 700 myń dollar talap etkender ustaldy.