Qaraǵandy oblysynda «Kitap oqıtyn ult» jobasynyń jeńimpazdary marapattaldy
QARAǴANDY. KAZINFORM — Qaraǵandy oblysynda «Kitap oqıtyn ult» aýqymdy aǵartýshylyq jobasynyń qorytyndysy shyǵaryldy. Qysqa ýaqyt ishinde bul bastama jaı ǵana baıqaý sheńberinen shyǵyp, óńirde keń aýqymdy oqý qozǵalysyna aınaldy. Oqyrman mádenıetin damytýǵa, halyqtyń zııatkerlik áleýetin arttyrýǵa jáne rýhanı qundylyqtardy dáripteýge baǵyttalǵan joba jurtshylyqtyń úlken qoldaýyna ıe boldy.
Jobaǵa oblys boıynsha 67 myńnan astam adam qatysyp, kitapqa degen erekshe qyzyǵýshylyqtyń bar ekenin kórsetti. Olardyń qatarynda oqýshylar, ustazdar, memlekettik qyzmetshiler, eńbek ujymdary, joǵary oqý oryndary men kolledj stýdentteri, sondaı-aq tutas otbasylar bar.
Joba Memleket basshysynyń bastamasymen pılottyq formatta Qaraǵandy oblysynda iske qosyldy. Eń joǵary qamtý kórsetkishi dál Qaraǵandy óńirinde tirkeldi.
Baıqaý qazaq jáne orys lıgalary boıynsha eki baǵytta, sondaı-aq alty nomınatsııa aıasynda ótti. Qatysýshylar sarapshylar usynǵan 15 shyǵarmany oqyp, elektrondy oqyrman kúndeligin júrgizdi. Onda ár kitapqa taldaý jasap, alǵan áserleri men oılaryn bólisti. Іrikteý kezeńi testileý formatynda ótip, úzdikter oblystyq deńgeıdegi zııatkerlik saıysqa joldama aldy.
Eń aýqymdy sanattardyń biri — «Kitap oqıtyn áýlet» nomınatsııasy boldy. Bul baǵytta myńdaǵan otbasy baq synap, olardyń ishinde Shalqarovtar áýleti júldeli orynǵa ıe boldy. Qatysýshylardyń aıtýynsha, bul joba otbasylyq kitap oqý dástúrin nyǵaıtyp, balalardyń kitapqa degen qyzyǵýshylyǵyn arttyrýǵa yqpal etken.
Jeńimpazdardy marapattaý rásimi 23 sáýir — Ulttyq kitap kúnine oraı ótti. Barlyq sanattar boıynsha úzdikterge qomaqty aqshalaı syılyqtar tabystaldy: birinshi oryn — 1 mln teńge, ekinshi oryn — 600 myń teńge, úshinshi oryn — 400 myń teńge.
Joba aıasynda tek bilim ǵana emes, jańa oqý mádenıeti qalyptasa bastady. Qatysýshylar arasynda synı oılaý, taldaý jasaý, pikir bildirý daǵdylary damyp, kitaptyń qoǵamdaǵy róli qaıta aıqyndala tústi.
Oblys ákimi Ermaǵanbet Bólekpaev bul bastamanyń mańyzdylyǵyn erekshe atap ótti. Onyń aıtýynsha, joba halyqtyń kitapqa degen qyzyǵýshylyǵynyń joǵary ekenin dáleldep, sanaly túrde damý jolyn tańdaǵan qoǵamnyń qalyptasyp kele jatqanyn kórsetti.
— Olaı bolsa, osynaý ıgi bastama mindetti túrde jalǵasyn tabý kerek! Búkil óńir jurtshylyǵyn ortaq muratqa jumyldyrǵan joba halyq sanasyna serpin beretin úlken qozǵalysqa aınalsyn! — dedi oblys ákimi.
Sonymen qatar óńirde kitap oqýǵa qolaıly jaǵdaı jasaý baǵytynda da naqty qadamdar júzege asýda. Qaraǵandy qalasynda jańa qoǵamdyq kitaphanalar ashylyp, bolashaqta zamanaýı kitap keńistikterin qurý josparlanýda.
Búginde «Kitap oqıtyn ult» jobasy jaı ǵana baıqaý emes, qoǵamda ıntellektýaldy básekelestik qalyptastyratyn, bilim men rýhanııatty dáripteıtin mańyzdy qozǵalysqa aınaldy.
Igi bastama Qaraǵandy oblysynda jalǵasyn tappaq.
